د دید خبري اژانس: په سعودي عربستان کې د افغانستان د سفارت سرپرست مولوي عبدالفتاح سخي، د خلیج د همکارۍ شورا له عمومي منشي جاسم محمد البدوي سره په ریاض کې د شورا د عمومي منشي په مرکزي دفتر کې وکتل او د دوه اړخیزو اړیکو په اړه یې نظرونه تبادله کړل.
د خلیج د همکارۍ شورا د راپور له مخې، دا غونډه د یکشنبې په ورځ په سعودي عربستان کې د شورا د عمومي منشي په مرکزي دفتر کې وشوه.
په دې غونډه کې، دواړو خواوو د افغانستان او د خلیج د همکارۍ شورا د غړو هیوادونو ترمنځ د اړیکو او د دوه اړخیزو همکاریو د پراخولو په لارو چارو بحث وکړ. د ګډو ګټو یو شمیر مسلو باندې هم بحث وشو.
د خلیج د همکارۍ شورا د راپور له مخې، مولوي سخي او جاسم محمد البدیوي هم د وروستیو سیمه ایزو او نړیوالو پرمختګونو په اړه خپل نظرونه تبادله کړل، خو د دې خبرو اترو د موضوعاتو په اړه نور جزئیات نه دي خپاره شوي.
دا غونډه په داسې وخت کې ترسره کیږي چې د طالبانو حکومت هڅه کوي چې د سیمې له هیوادونو، په ځانګړې توګه د خلیج له هیوادونو سره خپلې اړیکې پیاوړې او پراخې کړي.