د دید خبري اژانس: چین ته د ډونالډ ټرمپ له سفر څخه څو ورځې وروسته، کرملین اعلان وکړ چې د روسیې ولسمشر ولادیمیر پوتین به چین ته د دوه ورځني سفر لپاره لاړ شي او د ثور(غویي) په ۲۹ او ۳۰ به په بیجینګ کې پراخې غونډې او خبرې اترې وکړي.
د کرملین مرستیال یوري اوشاکوف وویل چې د پوتین سفر به “ډیر شدید او پراخ” وي. د کرملین د اعلان له مخې، د روسیې ولسمشر به د چین له ولسمشر شي جین پینګ سره وګوري او خبرې به وکړي، او دوه اړخیزې خبرې اترې به د دواړو خواوو ترمنځ د محدودو او پراخو غونډو په بڼه ترسره شي.
د راپور له مخې، دواړه مشران به د “روسیې-چین تعلیمي کلونو” ګډ پروګرام هم پرانیزي او د مهمو نړیوالو مسلو په اړه به نظرونه تبادله کړي.
د دې سفر په جریان کې، ولادیمیر پوتین به د چین له لومړي وزیر لی کیانګ سره هم وګوري. د دې خبرو اترو اصلي تمرکز د مسکو او بیجینګ ترمنځ سوداګریز او اقتصادي همکاري بلل شوې ده.
کرملین ټینګار کړی چې د روسیې او چین ترمنځ ستراتیژیک ملګرتیا، چې په تیرو ۲۵ کلونو کې رامینځته شوې او د دواړو هیوادونو ترمنځ د ښه ګاونډیتوب تړون له لاسلیک وروسته، د ګاونډیو هیوادونو ترمنځ د اړیکو لپاره یوه نمونه ګرځیدلې ده.
روسي چارواکو ویلي چې د همدې دلیل لپاره، د دواړو هیوادونو د مشرانو ترمنځ د لوړې کچې غونډې په منظمه او مکرر ډول ترسره کیږي.