د دید خبري اژانس: د طالبانو د حکومت د لوړو زده کړو وزیر ندا محمد ندیم په مشرۍ یو ۱۴ کسیز پلاوی د روسیې د تاتارستان جمهوریت کازان ته سفر کړی ترڅو د “روسیه او اسلامي نړۍ” په یوولسمه سرمشریزه کې ګډون وکړي.
د طالبانو د لوړو زده کړو وزارت ویاند مولوي ضیاءالله هاشمي اعلان وکړ چې د دې ډلې د لوړو زده کړو وزیر ندا محمد ندیم په مشرۍ یو ۱۴ کسیز لوړ پوړی پلاوی د روسیې د تاتارستان جمهوریت پلازمینې کازان ته سفر کړی دی. ټاکل شوې ده چې پلاوی به د “روسیه او اسلامي نړۍ” په نوم د کازان په یوولسمه سرمشریزه کې چې د ۲۰۲۶ کال د می له ۱۳ څخه تر ۱۵ پورې ترسره شي، ګډون وکړي.
په پلاوي کې د صنعت او سوداګرۍ وزیر، د مالیې، اقتصاد، کار او ټولنیزو چارو، کانونو او پټرولیم، عامې روغتیا مرستیال وزیران، په مسکو کې د طالبانو سفیر او د اړوندو څانګو یو شمیر مشران شامل دي.
د هاشمي په وینا، د دې غونډې په څنډه کې او د روسیې د غوښتنې په اساس، د افغانستان او روسیې فدراسیون ترمنځ د ګډ اقتصادي او سوداګرۍ کمیسیون لومړۍ غونډه به هم ترسره شي. تمه کیږي چې دا غونډه به د دواړو هیوادونو ترمنځ د اقتصادي، سوداګرۍ او پانګونې همکارۍ پراخولو لپاره لاره هواره کړي.