د دید خبري اژانس: د کډوالو لپاره د ملګرو ملتونو عالي کمیشنرۍ (UNHCR) په پاکستان کې د افغان کډوالو د اندیښنې وړ وضعیت په اړه په یوه نوي راپور کې ویلي چې په هیواد کې ۷۷ سلنه افغان ماشومان له زده کړې او مهارتونو روزنې، روغتیایی خدماتو او ټولنیز ملاتړ څخه محروم دي.
د راپور له مخې، په پاکستان کې شاوخوا ۷۷ سلنه افغان کډوال ماشومان رسمي زده کړې یا د مهارتونو روزنې پروګرامونو ته لاسرسی نلري؛ دا احصایه چې د افغان کډوالو کورنیو ترمنځ د تعلیمي بحران ژوروالی په ګوته کوي.
ملګرو ملتونو ټینګار وکړ چې د اعتبار وړ هویت اسنادو نشتوالی، اقتصادي ستونزې، د توقیف او جبري شړلو ویره، او همدارنګه د ماشومانو په توګه د کار کولو لپاره د کورنیو اړتیا، د دې ماشومانو د تعلیمي محرومیت لپاره ترټولو مهم دلیلونه دي.
په راپور کې ویل شوي چې په پاکستان کې ډیری افغان کورنۍ د شړلو د دوامداره ویرې له امله په پټه کې ژوند کولو ته اړ شوي، چې ښوونځیو، روغتیایی مرکزونو او ملاتړ خدماتو ته یې لاسرسی خورا محدود کړی دی.
د نړیوالو سازمانونو په وینا، افغان ماشومان او تنکي ځوانان له دې شرایطو څخه تر ټولو ډیر رنځ وړي او د فقر، جبري کار، خوارځواکۍ او رواني صدماتو سره مخ دي.
د کډوالو عالي کمیشنرۍ دا هم اعلان وکړ چې په پاکستان کې نږدې نیمایي افغان ماشومان له مناسبو روغتیايي خدماتو څخه بې برخې دي، او ډیری کورنۍ د لوړ لګښتونو یا د قانوني اسنادو نشتوالي له امله نشي کولی روغتیایی مرکزونو ته لاړ شي.