د نجونو زدهکړو د محدودیتونو دوام؛ د یوناما ژوره اندېښنه
دید خبرې آژانس: په افغانستان کې د ملګرو ملتونو د سیاسي استازولۍ دفتر (یوناما) د څلورم پرلهپسې کال لپاره له شپږم ټولګي پورته د نجونو پر زدهکړو د محدودیتونو د دوام له امله خپله ژوره خواشیني څرګنده کړې ده.
یوناما په یوه اعلامیه کې ویلي، د نجونو د زدهکړو مخنیوی نه یوازې د بشري حقونو وضعیت پېچلی کوي، بلکې پر بشردوستانه مرستو او اقتصاد هم ناوړه اغېز کوي.
په دغه اعلامیه کې د یوناما د مشرې روزا اوتونبایوا له قوله ویل شوي چې د نجونو د زدهکړې منع نه یوازې د هغوی د راتلونکي لپاره د هیلو لید له منځه وړي، بلکې د افغانستان د ټول ولس پر سوله او هوساینې هم اغېز کوي.
مېرمن اوتونبایوا زیاته کړې: «زه ناهیلې یم چې واکمن چارواکي لا هم د افغانستان له ګوټګوټ څخه د خلکو غوښتنې نادیده نیسي؛ خلکو چې د کلونو جګړې زغملي او اوس له بشري کړکېچ سره مخ دي. دا محدودیت د افغانستان د بېرته رغېدو هیله کموي او باید لرې شي.»
یوناما زیاته کړې چې تر شپږم ټولګي پورته د نجونو پر زدهکړو محدودیت، د افغانستان د نړۍوالې انزوا له اصلي لاملونو دی.
د یوناما مشره وايي: «دا محدودیت لا هم د افغانستان د نړۍوالې انزوا یو له اصلي لاملونو دی چې د دغه هېواد د بیارغونې بهیر شاته وړي. سره له دې، زه له نړۍوالو تمویل کوونکو غواړم چې تر خپله وسه د افغان ولس په ځانګړي ډول د زدهکړې په برخه کې، ملاتړ ته دوام ورکړي.»
له بلې خوا، د ماشومانو د ملاتړ لپاره د ملګرو ملتونو صندوق (یونیسف) د معلوماتو له مخې، د شپږم ټولګي پورته د نجونو پر زدهکړو محدودیت تر دې دمه پر ۲.۲ میلیونه افغان نجونو اغېز کړی، چې ۴۰۰ زره یې یوازې په روان کال کې اغېزمنې شوې دي.
یونیسف دا هم ویلي، که دا محدودیت تر ۲۰۳۰ کال پورې دوام ومومي، له ۴ میلیونو زیاتې نجونې به تر اغېز لاندې راشي.
دا په داسې حال کې ده چې د تېرې پنجشنبې په ورځ د پوهنې وزارت نوی پوهنیز کال پیل کړ خو یوازې د هلکانو او د شپږم ټولګي ښکته نجونو لپاره او د شپږم ټولګي پورته د نجونو د زدهکړو په اړه یې هيڅ نه دي ویلي.
