دید خبرې آژانس: د اسوشیېټډ پرس خبري اژانس د دولتي اسنادو له مخې راپور ورکړی، چې د کوچني اختر د رخصتیو له امله د افغان کډوالو د نیولو او ایستلو بهیر لس ورځې(د اپرېل تر ۱۰مې) نېټې ځنډول شوی دی.
د دغې رسنۍ په راپور کې راغلي، پاکستان هوډ لري، چې سږ کال له خپلې خاورې درې مېلیونه افغان کډوال وباسي.
د کډوالو د حقونو د برخې فعال نظر نظري په دې هکله وايي:«له پاکستانه د کډوالو جبري ایستل لنډمهاله حل دی، او پاکستان باید د هغو کډوالو لپاره بدیله لار ولټوي، چې کلونهکلونه یې هلته ژوند کړی دی. پاکستان باید دویمه لار او نوې تګلاره په نظر کې ونیسي، چې هم د پاکستان او هم د افغانستان په ګټه وي.»
بل پلو، د پاکستان ډان ورځپاڼې راپور ورکړی، چې د راولپنډۍ د پولیسو قومندان د بې اسنادو افغان کډوالو د نیولو او ایستلو امر کړی دی.
ورځپاڼه ډان لیکلي:«د راولپنډۍ د پولیسو قومندان په دې ولسوالۍ کې د بې اسنادو افغان کډوالو د ایستلو امر کړی؛ خو د پياوار کارت لرونکي کسان د جون تر ۳۰مې پورې د اوسېدو اجازه لري. په داسې حال کې چې د ای سي سي کارت لرونکي کسان باید په خپله خوښه له دغه هېواده ووځي، که نه وبه ایستل شي.»
اسلاماباد کې د کډوالو په چارو کې د ملګرو ملتونو عالي کمېشنري وايي، د افغان کډوالو جبري ایستل بې ګټې دي. د دغې ادارې مشره فیلیپا کانډلر وايي، ډېر هغه کسان چې په ۲۰۲۳ زېږدیز کال کې ایستل شوي وو، بېرته پاکستان ته تللي دي.
د کډوالو په چارو کې د ملګرو ملتونو د عالي کمېشنرۍ مشره وايي:«دوامداره ستنول په افغانستان کې د یوه سولهییز او خوندي چاپېریال د رامنځته کېدو په معنا دي او باید د افغانستان ملاتړ وشي، په ځانګړې توګه د زدهکړو، روغتیايي مراقبتونو او کارموندنې په برخو کې څو کډوال – په ځانګړې توګه ښځې او نجونې – له نورو ستونزو سره مخ نهشي او بېرته ادغام شي.»
بل پلو، د کډوالو او راستنېدونکو چارو وزارت سرپرست له نورو هېوادونو غواړي، چې د کډوالو جبري ایستل ودروي.
د کډوالو او راستنېدونکو چارو وزارت سرپرست مولوي عبدالکبیر وايي:«اسلامي امارت سره له دې له ګاونډیو هېوادونو غواړي، چې افغان کډوالو سره ناوړه چلند او د هغوی د جبري ایستل ودروي. دا خپل مسوولیت بولي، چې ټول افغان کډوال خپل هېواد ته راستانه او بېځایه شوې کورنۍ، خپلې اصلي مېنو ته ورسوي.»
دا په داسې حال کې ده، چې له دې مخکې د بښنې نړۍوال سازمان له پاکستانه غوښتي وو، چې له ځنډ پرته د افغان کډوالو جبري ایستلو طرحه لغوه کړي.
