البرټ پي خوروف د کابل او اسلاماباد ترمنځ د مسکو پر منځګړیتوب ټینګار وکړ
دید خبرې آژانس: په پاکستان کې د روسیې سفیر، له یوې روسي رسنۍ سره په خبرو کې ویلي، چې د اسلاماباد او کابل ترمنځ د پیچلو مسایلو حل د دواړو هېوادونو مسوولیت دی؛ خو بیا هم مسکو چمتو دی چې د دغو دوو هېوادونو ترمنځ منځګړیتوب وکړي.
البرټ پي خوروف همدارنګه ټینګار کړی، چې دواړه هېوادونه [افغانستان او پاکستان] د مسکو لپاره مهم شریکان دي.
په پاکستان کې د روسیې سفیر په دې هکله ویلي:«دا د اسلاماباد او کابل مسوولیت دی، چې د پاکستان او افغانستان ترمنځ پیچلتیاوې حل کړي. روسیه تل چمتو ده چې د دواړو هېوادونو ترمنځ د خبرو اترو د پيلولو لپاره د اسانتیا برابرونکي رول ولوبوي. دواړه هېوادونه زموږ مهم شریکان دي.»
بلخوا د کابل او اسلاماباد ترمنځ د لفظي ناندریو په لړ کې د پاکستان د لومړي وزیر ځانګړي مرستیال طارق فاطمي ادعا کړې، چې په افغانستان کې مېشتې وسلوالې ډلې د پاکستان په ناامنیو کې لاس لري. ښاغلي فاطمي د پاکستان او افغانسان ترمنځ شته ننګونو ته په نغوتې سره ټينګار کوي، چې ښې اړیکې د دواړو هېوادونو په ګټه دي.
د پاکستان د لومړي وزیر ځانګړی مرستیال ویلي:«دا هماغه اړیکې دي، چې پهکې ډېرناسم پوهاوي او ناسم تصورات شته؛ خو د پاکستان او افغانستان ترمنځ سولهییزې اړیکې د دواړو هېوادونو لپاره اړینې دي.»
پاکستان په پرلهپسې توګه، په افغانستان کې د پاکستاني طالبانو د تحریک (ټيټيپي) د غړو د حضور ادعاوې کوي، اسلامي امارت تل ویلي، چې ټي ټي پي او نورې وسلوالې ډلې په افغانستان کې حضور نهلري او دا ادعاوې بې بنسټه دي.
د پاکستان پخواني لومړي وزیر عمران خان هم د کابل او اسلاماباد ترمنځ د شته ستونزو د حل لپاره د سولهییزو مذاکراتو پر اړتیا ټینګار کړی دی.
