د دید خبري اژانس: د کندهار په نړیوال هوايي ډګر کې د نوي ترمینل او د موټرو د تمځای جوړولو کار د طالبانو د حکومت د ټرانسپورټ او هوايي چلند وزارت د چارواکو په شتون کې پیل شو.
د کندهار په نړیوال هوايي ډګر کې د نوي ترمینل او د موټرو د تمځای جوړولو پروژه په رسمي ډول د طالبانو د حکومت د ټرانسپورټ او هوايي چلند وزارت د عملیاتو مرستیال مولوي فتح الله منصور او د ولایت د یو شمیر سیمه ایزو چارواکو په شتون کې پیل شوه.
د چارواکو په وینا، دا پروژه، چې له ۸۰۰ ملیون افغانیو څخه ډیره ارزښت لري، به په دوو مرحلو کې پلي شي او اصلي هدف یې د خدماتو وړاندې کول، د مسافرینو ظرفیت لوړول او په هوايي ډګر کې د معیاري اسانتیاوو رامینځته کول دي.
د دې پلان په چوکاټ کې، یو نوی ترمینل چې عصري اسانتیاوې لري جوړ شي چې هره ورځ به شاوخوا د ۳۰۰۰ مسافرین ظزفیت ولري.
همدارنګه، د موټرو د تمځای جوړول، د ترافیکو ښه تنظیم او د مسافرینو لپاره د اړینو اسانتیاوو برابرول د دې پروژې نورې برخې دي.
د طالبانو د حکومت د ټرانسپورټ او هوايي چلند وزارت چارواکو ټینګار کړی چې د دې پروژې په بشپړیدو سره به د کندهار په هوايي ډګر کې د خدماتو کچه د پام وړ ښه شي او د کورنیو او نړیوالو الوتنو د زیاتوالي لپاره به لاره هواره کړي.
ویل کیږي چې د دې پروژې د جوړولو کار به په راتلونکو دوه نیمو کلونو کې بشپړ او په کار واچول شي.
د کندهار نړیوال هوايي ډګر د هیواد یو له مهمو هوايي ډګرونو څخه ګڼل کیږي، او د هغې پراختیا کولی شي په اقتصادي وده، د خلکو د تګ راتګ اسانتیا او د سوداګریزو اړیکو پراخولو کې مهم رول ولوبوي.