مسکو: امیرخان متقي د مسکو ناستې اصلي مېلمه دی
دید خبرې آژانس: د مسکو فرمټ شپږمه ناسته کې چې د اکتوبر پر څلورمه نېټه ترسره کیږي، د طا-لبانو د بهرنیو چارو سرپرست وزیر ته د «اصلي مېلمه» په توګه بلنه ور کړل شوې ده.
د روسیې د بهرنیو چارو وزارت ویاندې ماریا زاخارووا د چهارشنبې په ورځ په مسکو کې یوې خبري ناستې ته وویل، چې د مسکو فرمټ ناسته د اکتوبر پر څلورمه په پلازمېنه مسکو کې [د هېوادونو] د ځانګړو استازو په ګډون ترسره کیږي.
د روسیې د بهرنیو چارو وزیر سرګي لاوروف هم دې ناستې ته بلل شوی.
زاخارووا په خپلو خبرو کې وویل، چې په دې ناسته کې د ګډون لپاره هند، ایران، قزاقستان، چین، کرغیزستان، پاکستان، تاجیکستان، ترکمنستان، ازبکستان او د طا-لبانو د بهرنیو چارو وزیر امیرخان متقي ته هم بلنه ورکړل شوې ده.
د زاخارووا په وینا، امیرخان متقي د ناستې اصلي مېلمه دی چې د یوه پلاوي په مشرۍ به مسکو ته لاړ شي.
د انټرفاکس خبري اژانس د رپوټ له مخې، د روسیې د بهرنیو چارو وزیر سرګي لاوروف به ددې ناستې ګډونوالو ته هرکلی وايي.
زاخارووا وايي، په دې ناسته کې به په افغانستان کې د ملي پخلاینې او د سیمې هېوادونو او کابل ترمنځ د عملي همکاریو پر موضوعاتو تمرکز وشي.
ددې ناستې په پای کې ټاکل شوې، چې د روسیې د بهرنیو چارو وزیر له امیرخان متقي سره پر دوه اړخیزو همکاریو او نورو کلیدي مسایلو ناسته وکړي.
