د روسیې سفیر: د افغانانو پر شتمنیو لګول شوي بندیزونه ظالمانه دي
دید خبرې آژانس: د طا-لبانو تر واک لاندې باختر خبري اژانس لیکلي، چې په کابل کې د روسیې سفیر د طا-لبانو د چاپېریال ساتنې د ادارې له مشر سره په کتنه کې ویلي چې د افغانانو پر شتمنیو او نړۍوالو مرستو د امریکا او نورو هېوادونو لګېدلي بندیزونه ظالمانه دي.
د روسیې سفیر دیمیتري ژېرونوف د سې شنبې په ورځ د (وږي په ۳مه) د طا-لبانو د چاپېریال ساتنې ادارې له مشر مطیع الحق خالص سره په لیدنه کې د اقلیمي بدلون په وروستي نړۍوال کنفرانس کې د افغانستان د استازي د نه ګډون په اړه اندېښنه ښودلې.
نوموړي ویلي:« د افغانانو پر شتمنیو او پر نړۍوالو بشري مرستو د امریکا او نورو هېوادونو له لوري بندیزونه ظالمانه دي.»
نوموړي ویلي، چې روسیه له افغانانو سره د مرستو په برخه کې ژمنه ده.
د ښاغلي خالص له قوله لیکل شوی چې طا-لبان د نړۍوال ۱۶ کنوانیسیون ټولو اصولو ته ژمن دي او د دغه کنوانسیون د غړیتوب امتیاز هم ورکوي؛ خو په دې برخه کې ورسره هېڅ ډول همکاري نه ده شوې.
په یاده لیدنه کې دواړو لوریو د دوه اړخیزو همکاریو په ترسره کولو ټینکار کړی.
خو د روسیې سفارت د دغې لیدنې په اړه څه نه دي ویلي.
دا په داسې حال کې ده، چې د سیمې د نورو هېوادونو پرتله روسیه د طا-لبانو سره ډېر نږدې اړیکي پالي؛ خو تر اوسه لاهم د روسیې په ګډون هیڅ هېواد د طالبانو حکومت په رسیمت نه دی پېژندلی او په ډېرو نړۍوالو غونډو کې دغې ډلې ته بلنه نه ورکول کېږي.
