طا-لبان د خپلې خوښې شنونکي د رسنیو سیاسي خپرونو ته معرفي کوي
دید خبرې آژانس: د افغانستان له خبریالانو د ملاتړ سازمان پر رسنیو د طا-لبانو د نویو بندیزونو په غبرګون وایي، چې دغه ډله د خپلې خوښې شنونکي په سیاسي خپرونو کې د ګډون په موخه رسنیو ته معرفي کوي.
یاد سازمان نن د یوې اعلامیې په خپرولو د طا-لبانو دا کړنه یو بل سانسور او د بیان پر ازادۍ جدي بندیز وباله.
د افغانستان له خبریالانو د ملاتړ سازمان د رسنیو پر سیاسي خپرونو د طا-لبانو د نوي بندیز په اړه د اندېښنې په څرګندولو سره د رسنیو له ملاتړو سازمانونو غوښتي، چې په دې برخه کې قاطع دریځ غوره کړي.
دغه سازمان په خپله اعلامیه کې لیکلي: «له ټولو هغو بنسټونو چې د بیان د ازادۍ، رسنیو او د بشري حقونو ملاتړ کوي غواړو، چې د طا-لبانو د دې ځپونکو پرېکړو پر وړاندې کلک او قاطع دریځ غوره کړي.»
یاد سازمان دغه راز له نړۍوالې ټولنې غواړي، چې د طا-لبانو دا اقدامات بې ځوابه پرېنږدي.
یوې سرچینې ویلی وه چې طا-لبان غواړي په افغانستان کې پر کورنیو رسنیو د بندیزونو نوې څپه پیل کړي.
طا-لبانو بیا د دې تازه بندیزونو د عملي کېدو په تړاو تر اوسه په رسمي توګه څه نه دي ویلي.
په افغانستان کې پر رسنیو د طا-لبانو له محدودیتونو سره – سره ځینې رسنۍ ګردي مېزونه او سیاسي خپرونې جوړوي، خو طا-لبان له دغو سیاسي خپرونو او تحلیلونو سخته اندېښنه لري او دغه ډله غواړی، چې د دې خپرونو له بندولو سره سانسور نور هم زیات کړي او کنټرول شوي معلومات خپاره شي.
دا پر رسنیو د طا-لبانو نوی بندیز نه دی، دغې ډلې تر دې وړاندې هم د لسګونو فرمانونو په صادرولو سره د رسنیو پر فعالیتونو پراخ محدودیتونه وضع کړي دي.
څو ورځې وړاندې د طا-لبانو د اطلاعاتو او کلتور وزارت د خپرونو چارو معینیت چارسمبالي ضیاء الحق حقمل ویلي وو، چې رسنۍ دې د هغو بهرنیو کسانو راپورونه نه را نقلوي، چې د افغانستان په اړه ناسم تحلیلونه کوي.
بل خوا دغې ډلې په دې وروستیو کې په کندهار ولایت کې د ملا هبت الله په امر د ملي ټلویزیون پر خپرونو بندیز لګولی او د بندیز لامل هم په دې رسنۍ کې د ژوندیو انځورونو خپرول بلل شوی دی.
د یادولو ده، چې طا-لبانو په تېرو درېیو کلونو کې د دغو بندیزونو ترڅنګ لسګونه خبریالان نیولي، بندیان کړي، وهلي، ګواښلي او په بندخونو کې یې سخت شکنجه کړي هم دي.
سره له دې چې له رسنیو او خبریالانو سره د طا-لبانو دغه چلند د خبریالانو د ملاتړو ادارو له سخت غبرګون سره مخ شوی؛ خو یادې ډلې نه یوازې دا چې خپل دریځ د رسنیو او خبریالانو پر وړاندې بدل کړی نه دی، په دې وروستیو کې یې خپلې سخت دریځۍ لا پسې زیاتې کړي دي.
