په افغانستان کې د خلکو پر امنیت او خوندیتوب د ګوترېش ټینګار
دید خبرې آژانس: د ملګرو ملتونو سرمنشي انتونیو ګوترېش په دایکنډي کې د هزاره توکمو وژنه غندلې او هغه یې «شرموونکې» بللې ده.
د ملګرو ملتونو سازمان ویاند سټیفن دوجاریک په یوې خبری ناسته کې وویل، چې انتونیو ګوترېش په افغانستان کې د ولسي خلکو پر امنیت او خوندیتوب ټینګار کړی.
نوموړي د جمعې په ورځ (د وږي په ۲۳مه) یوې خبري ناستې ته ویلي، چې ښاغلي ګوترېش د پېښې د قربانیانو له کورنیو سره خواخوږي څرګنده کړې او هغوی ته یې ډاډګېرنه ورکړې ده.
په افغانستان کې د ملګرو ملتونو استازي دفتر (یوناما) هم د جمعې په ورځ (د وږي ۲۳مه) په یوې خبرپاڼه کې د وژل شویو له کورنیو سره د خواخوږۍ څرګندولو تر څنګ، د پېښې په اړه د څېړنو او په دې برخه کې یې د طالبانو د ځواب ویلو غوښتنه کړې وه.
د پنجشنبې په ورځ په هزاره ولسي وګړو د غور او دایکنډي تر منځ پر غځېدلې لار د قرودال په سیمه کې د یو برید له امله لږ تر لږه ۱۴ تنه ووژل شول او څلور تنه نور ټپیان شول.
له دغه برید څو ساعته وروسته داعش ډلې د برید پړه ومنله او ویې ویل، چې په دغه برید کې یې ۱۵ تنه وژلي دي.
