پاکستان د اختلافاتو له امله درانی ګوښه کړ
دید خبرې آژانس: پاکستاني رسنیو خبر ورکړی، چې د دغه هېواد حکومت د افغانستان په چارو کې خپل ځانګړی استازی آصف درانی د افغانستان په اړه په خپله تګلاره کې د اختلافاتو له امله له دندې ګوښه کړی دی.
آصف دراني هم د دغه هېواد رسنیو ته په یوه پیغام کې د خپل ګوښه کېدل تایید کړي دي.
د پاکستان د بهرنیو چارو وزارت د جمعې په ورځ په یوه لیک کې اعلان وکړ چې د افغانستان په چارو کې د دغه هېواد ځانګړی استازی له خپلې دندې لیرې شوی دی.
پاکستاني رسنیو لیکلي: «پوځ د آصف دراني له کړنو ناخوښه و. د دراني ناهيلي هم مخ په زیاتېدو وه. ځکه چې د هغه د پالیسۍ سپارښتنې په منظمه توګه د هغه مدیرانو لخوا له پامه غورځول کېدلي، هغه خپلې اندېښنې د خپلو وروستیو لیدونکو سره شریکې کړې وې.»
د دغو راپورونو پر بنسټ، آصف درانی د تېر کال په مى میاشت کې د پاکستان د حکومت لخوا د افغانستان په چارو کې د ځانګړي استازي په توګه په دې تمه وګومارل شو، چې د طالبانو تر واکمنۍ لاندې د افغانستان او د اسلام اباد ترمنځ ترینګلې اړيکې، په ځانګړې توګه په افغانستان کې د تحریک طالبان پاکستان د پناه ځایونو په اړه؛ ستونزې حل کړي خو دا کړکېچ لا تر اوسه نه دی حل شوی.
د يادولو وړ ده، چې ښاغلی درانی له پاکستانه د افغان کډوالو د ډله ييز اخراج مخالف و او تر دې وړاندې یې استدلال کاوه، چې دا کار له افغانستان سره د پاکستان پر پوله پر کنټرول ناوړه اغېز کوي او د دغه هېواد پر وړاندې د افغان طالبانو دریځ نور هم ستونزمنوي.
د پاکستاني رسنیو د راپورونو پر بنسټ، د دغه هېواد ځانګړى استازى په دې باور دي، چې پاکستان باید په خپله خاوره کې د ترهګرۍ ستونزه مدیریت کړي.
د يادولو وړ ده، چې آصف درانی د افغانستان په چارو کې د پاکستان د ځانګړي استازي په توګه د خپلې دندې د ترسره کولو په اړه د دغه هېواد د پوځ له خوا تر فشار لاندې و.
پاکستاني رسنیو لیکلي: « د پوځ لخوا افغانستان سره د هغه د اړیکو په آسانولو کې د ښاغلي دراني پر رول د نږدې څارنې د هغه ډیپلوماتیک انعطاف محدود کړ او له افغان طالبانو سره د خبرو اترو لپاره د هغه لپاره لږ ځای پاتې شو.»
دا په داسې حال کې ده، چې محمد صادق چې له ښاغلي دراني مخکې د افغانستان په چارو کې د پاکستان د ځانګړي استازي په توګه دنده درلوده، هم له خپلې دندې استعفا کړې وه.
پاکستاني رسنیو راپور ورکړی چې آصف درانی د اسلام اباد په مرکز کې د یوه فکري مرکز، د پالیسي څېړنو لپاره د اسلام آباد په انستیتوت کې خپل څېړنیز کار ته راستون شوی دی.
