ملا هبت الله اخوندزاده: ما ته دعا وکړئ
دید خبرې آژانس: د طا-لبانو مشر ملا هبت الله اخوندزاده د خپلې بریا د درېیمې کلیزې په وینا کې د خپلې ډلې له غړو یو ځل بیا غوښتي چې له نفاق څخه لاس واخلي او پر افغانانو یې غږ کړی، چې د وخت امیر ته دعا واجب ده او باید ده ته دعا وکړي.
نوموړی زیاتوي، چې په افغانستان کې امنیت د الله له اړخه راغلی دی او پر خپلو پلویانو یې غږ کړی، چې غفلت ونه کړي.
هغه زیاته کړه: ” ګورئ چې زړونه په منصبونو کې بند نه کړئ، په خپل منځ کې دوستي او دښمني یوازې د الله لپاره وکړی او د قرابت لپاره دوستي مه کوئ، د قدرت او قومیت شوق په ځان کې مه پېدا کوئ”.
ملا هبت الله په خپله وینا کې طا-لبانو ته په اشارې سره ویلي، چې په افغانستان کې عدالت راولئ او که چېرې مو ظلم او سفارش وکړ نو د دوی نظام به دوام ونه شي کړی.
هغه وايي: ” څلوېښت کاله کیږي، چې د افغانستان پر مسلمانانو ظلمونه شوي دي، دغو خلکو سره مرسته وکړئ او اسلام ور وښیئ”.
نوموړي د خپل حکومت پر چارواکو غږ کړی، چې د بیت المال ساتنه وکړئ او د افغانستان له خلکو څخه یې غوښتنه کړې، چې طالبانو ته دعا وکړي.
ملا هبت الله زیاته کړې ده: “دا واجب ده چې تاسو د وخت امام او امیر ته دعا وکړئ”.
د طا-لبانو دغه مشر چې تر اوسه په عام محضر کې نه دی را ښکاره شوی له خلکو غوښتي، چې د فلسطین مسلمانانو ته هم دعا وکړي.
د طا-لبانو د مشر ملا هبت الله دغه نېږدې ۱۹ دقیقې وینا تر ډېره نصیحتي بڼه لرله، چې لویه برخه یې د طا-لبي حکومت چارواکو او یوازې څلور دقیقې یې د افغانستان له خلکو د دعا غوښتنه کړې ده.
دا لومړی ځل نه دی، چې د طا-لبانو مشر د خپل ډلې غړو ته د یووالي او اتحاد نصیحت کوي؛ بلکې له دې وړاندې یې هم په کراتو – کراتو د خپلې ډلې له غړو غوښتي، چې له نفاق څخه لاس واخلي او په خپل منځ کې سره یو شي.
