دید خبرې آژانس: د طا-لبانو د ریاست الوزرا سیاسي مرستیال مولوي عبدالکبیر د یوه پلاوي په مشرۍ د ایران د نوي ټاکل شوي ولسمشر مسعود پزشکیان د لوړې په مراسمو کې د ګډون په موخه ایران ته په درې ورځني سفر ولاړ.
ویل کیږي، چې نوموړی به د درېیو ورځو لپاره په ایران کې پاتې شي.
د طا-لبانو تر واک لاندې ارګ په اېکس پاڼه د دوشنبې په ورځ د (زمري اتمه) لیکلي، چې د ریاست الوزرا سیاسي مرستیال مولوي عبدالکبیر د یوه پلاوي په مشرۍ د ایران په رسمي بلنه یاد هېواد ته په سفر ولاړ.
د معلوماتو له مخې، دغه طا-لب چارواکی به د ایران د نوي ټاکل شوي ولسمشر مسعود پزشکیان د لوړې په مراسمو کې د ګډون تر څنګ یو شمېر نورې رسمي ناستې او لیدنې هم ولري.
مولوي عبدالکبیر به د ایراني چارواکو سره په رسمي ناستو کې د دواړو هېوادونو تر منځ د سیاسي او اقتصادي اړیکو د پیاوړتیا، په ایران کې د مېشتو افغان کډوالو د ستونزو د حل او د همکاریو په پراختیا خبرې وکړي.
ویل کیږي چې دغه طالب پلاوی به د درې ورځني سفر پر مهال په ایران کې د یو شمېر نورو هېوادونو له استازو سره هم وګوري.
دغه طا-لب پلاوی په داسې حال کې ایران ته سفر کوي، چې په ورستیو څو ورځې کې په ایران کې د مېشتو افغان کډوالو پر ضد په دغه هېواد کې لاریونونه شوي او همدارنګه د ایرانیانو له لوري د افغان کډوالو د ځورولو تر څنګ هغوی په دغه هېواد کې له کار کولو څخه هم منع شوي دي.
