متقي: نړېوالو خپله دنده نه ده ترسره کړې
دید خبرې آژانس: په افغانستان کې د طا-لبانو سرپرست حکومت د بهرنیو چارو وزیر د دغې ډلې له لوري د «کار ملي کنفرانس» په نوم جوړې شوې غونډه کې ویلي، نړېوالو ورسره د نشهيي توکو پر وړاندې مبارزه کې همکاري نه ده کړې.
امیرخان متقي وايي، د دې تر څنګ یې د افغانستان پر خصوصي سکټور بندیزونه هم لګولي.
د طا-لبانو د بهرنیو چارو وزیر نن سه شنبه د (زمري دویمه) د دغې ډلې د کار او ټولنیزو چارو وزارت له لوري د «کار ملي کنفرانس» په نوم جوړې شوې غونډه کې ویلي، نړېوالو ورسره د نشهيي توکو پر وړاندې مبارزه کې هغسې همکاري نه ده کړې، څنګه یې چې ژمنې ورسره کړې وې.
امیرخان متقي زیاتوي چې نړېوالو نه یوازې دا چې په افغانستان کې د نشهیي توکو پر وړاندې مبارزه نه ده ترسره کړې، بلکې د افغانستان پر بانکي سکټور او افغان سوداګرو د بندیزونو تر څنګ یې، افغان بزګرانو ته د نشهیي توکو د بدیل کښت په برخه کې همکاري نه ده کړې.
متقي په دغې غونډه کې د وینا پرمهال ویلي، «په افغانستان کې زورواکي له منځه تللې، ډلې ټپلې ختمې شوې، د فساد مخنیوی شوی، پر لویو پروژو کار روان دی او له افغانستانه هېڅ هېواد ته ګواښ نه دی پېښ.» خو بیا هم نړۍ په ځانګړي ډول ګاونډي هېوادونه هغسې مرسته نه کوي لکه څنګه چې لازمه وه.
د افغانستان په ګاونډ کې پاکستان هغه هیواد دی چې تل د طا-لبانو پر حکومت تور پوري کوي چې د افغانستان خاوره په پاکستان کې د ناامنیو لپاره کارول کیږي.
د طا-لبانو د کار او ټولنیزو چارو وزارت دغه دوه ورځینۍ غونډه د وزګارتیا د لاملونو ارزولو او خلکو ته د کاري زمینو د برابرولو په موخه جوړه کړې، چې ګډونوال یې د دولتي ادارو تر څنګ د خصوصي سکټور، د کورنیو او نړېوالو ادارو او سازمانونو استازي دي.
د طا-لبانو حکومت په تېرو نږدې درېیو کلونو کې په افغانستان کې د وزګارتیا په اړه هیڅ شمېرې نه دي خپرې کړې؛ خو د کډوالۍ نړېوالې ادارې بیا په ۱۴۰۲ لمریز کال کې ویلي و، چې شاوخوا ۷۰ سلنه افغانان وږي او له بېکارۍ سره مخامخ دي.
