د خیبر پښتونخوا چارواکي خبرداری: د قانوني افغان کډوالو شړل وضعیت لا پسې خرابوي
ډيډ خبري اژانس: د خيبر پښتونخوا ايالت وياند خبردارى ورکړى، چې په پاکستان کې په قانوني توګه د مېشتو افغانانو ځورول او شړل به د دواړو هېوادونو اړيکې نورې هم ترينګلې کړي.
د ډان د راپور له مخې، د خیبر پښتونخوا د حکومت ویاند محمد علي سیف ویلي، هغه افغانان چې په پاکستان کې په قانوني توګه ژوند کوي باید «نه ځورول کېږي او نه یې شړل کېږي».
هغه خبرداری ورکړ چې په دې برخه کې هر ډول اقدام د افغانستان او پاکستان اړیکې خرابولی شي.
د پاکستان حکومت د تېر کال په نوامبر کې د «ناقانونه بهرنیانو» د بېرته ستنولو لومړی پړاو پیل کړ.
د ۲۰۲۳ کال له نوامبر میاشتې راهیسې د اټکل له مخې د ۱.۷ میلیونو بې اسنادو افغانانو له ډلې څخه څومره خپل هېواد ته راستانه شوي، په دې اړه رسمي معلومات نه دي خپاره شوي.
خو د باخبرو سرچینو د معلوماتو له مخې په لومړي پړاو کې د خیبر پښتونخوا او بلوچستان له لارې افغانستان ته د راستانه شویو بې اسنادو افغانانو شمېر شاوخوا نیم میلیون تنه دی.
اسناد ښيي چې دوهم پړاو هڅه ده چې شاوخوا یو میلیون افغانان له اسنادو سره خپل هېواد ته واستوي.
د خيبر پښتونخوا ايالت وياند وايي، د دغه ايالت ټول ناقانونه کډوال لا له وړاندې بېرته خپل هېواد ته لېږل شوي او دا مهال د قانوني اوسېدونکو پر وړاندې هېڅ ډول اقدام نه کېږي.
هغه زیاته کړه: په لومړي پړاو کې موږ ته دنده وسپارل شوه چې په خیبر پښتونخوا کې غیرقانوني افغانان وپيژنو او هغوی یې وباسو. په خیبر پښتونخوا کې ټول بې اسناده افغانان افغانستان ته ستانه شوي دي.
سیف زیاته کړه: فدرالي حکومت یوازې موږ ته اړتیا لرو چې په خیبر پښتونخوا کې د قانوني اسنادو سره د افغانانو شمیر وپیژنو. زموږ شمېرې ښيي چې په دغه ایالت کې ۳۵۹ زره کسان ژوند کوي.
د هغه په وينا، د ناقانونه افغانانو شړل جواز لري، خو دلته مېشت قانوني افغانان نه شي ځورولاى او نه شړل کېږي.
هغه خبرداری ورکړ چې د قانوني افغانانو پر وړاندې هر ډول اقدام «زموږ او افغانستان ترمنځ کرکه، ناسم پوهاوی او بې باوري راپاروي».
