ملا یعقوب زما د پلار د شړلو مخالف وو/ زموږ کور اختلافی نه و

ډيډ خبري اژانس: د ګلبدین حکمتیار زوی وايي، چې د دفاع سرپرست وزیر ملا یعقوب له خپل کور څخه د حکمتیار د ایستلو مخالف و، خو «یو شمېر پخوانیو مشرانو» په دې خبره ټینګار وکړ.

حبیب الرحمن حکمتیار زیاته کړه چې د طا-لبانو په حکومت کې «یو څو محافظه کاران» هر څه کولای شي.

حبيب الرحمن حکمتيار دغه يادښت په خپل اکاونټ کې په X ټولنيزه شبکه کې د ذبيح الله مجاهد د څرګندونو په غبرګون کې ليکلی، چې د ښاغلي حکمتيار د دولتي استوګنې پر سر يې «اختلاف» و او اوس يې د اوسېدو ځای بدل شوی دی.

طا-لبانو ویلي چې د حکمتیار کور د دفاع وزارت تر واک لاندې دی.

د حکمتیار زوی په خپل یادښت کې د طا-لبانو په حکومت کې د نظر اختلاف او د واک انحصار ته اشاره کړې او لیکلي یې دي چې په داسې حال کې چې د طا-لبانو «ټول مشران» د نجونو د ښوونځیو پر پرانیستلو «موافق» دي، خو «یو کس» په دې وتوانید چې غالب شي.

هغه ذبیح الله مجاهد ته لیکلي چې د توجیه کولو پر ځای دې چوپه خوله پاتې شي ځکه چې د دوی مشورې ته اهمیت نه ورکول کیږي او د دین، عقل او منطق په خبره د عمل کولو توان نه لري.

د حکمتیار زوی مخکې اعلان وکړ چې طا-لبان د حزب اسلامي له مشر سره د پخواني حکومت د هوکړې پابند نه دي او اوس له طا-لبانو سره له میاشتو خبرو اترو وروسته ګلبدین حکمتیار «خپل ځای بدلوي».

د اشرف غني حکومت په ۲۰۱۵ کال کې له حزب اسلامي سره یو هوکړه لیک لاسلیک کړ چې له مخې یې دغه ګوند د امتیازاتو او قضايي مصونیت په بدل کې له افغان حکومت سره خپله لانجه پای ته ورسوله.