ډید خبري اژانس: پاکستاني رسنیو د افغان کډوالو د جبري ایستلو د دویم پړاو د پیلولو لپاره د دغه هېواد حکومت چمتووالی ښودلی دی.
د پاکستان د کورنیو چارو وزارت د پنجاب ایالت حکومت ته امر کړی چې د اپریل له ۱۵مې د افغان اتباعو د اخراج دوهم پړاو پیل کړي.
په دې مرحله کې، د «افغان اتباع کارت» (ACC) درلودونکي ایستل کیږي.
ویل کیږي چې وفاقي حکومت به د پنجاب ایالت حکومت ته د کارت لرونکو کسانو لیست چمتو کړي چې د پولیسو او نورو قانون پلي کونکو ادارو سره به شریک شي.
د پاکستاني رسنیو د راپورونو له مخې، د تابعیت کارت لرونکو څخه غوښتل شوي چې لومړی په خپله خوښه افغانستان ته ستانه شي، که نه نو دوی به ونیول شي او ویستل شي.
د بهرنیو اتباعو د ویستلو د دویم پړاو بشپړولو وروسته، په دریم پړاو کې به د POR (د استوګنې ثبوت) کارت لرونکي ويستل شي.
د تېر کال په پای کې پاکستان له افغانستانه د بې اسنادو کډوالو د ایستلو لومړی پړاو پیل کړ.
ویل کېږي چې له پاکستان څخه تر نیم میلیون ډېر افغانان بېرته خپل هېواد ته ستانه شوي دي.
