دید خبري آژانس: د «نسیم» راډیو چې شپږ میاشتې وړاندې د استخباراتو له خوا بنده شوې وه، بېرته په فعالیت پیل وکړ.
د دې رسنۍ يوه کارکوونکي وويل، چې نن شنبه( د کب ١٢مه) يې د دې سيمه ييزې راډيو خپرونې بيا پيل کړې دي.
هغه وویل چې طا-لبانو د دغې رسنۍ تجهیزات بیرته نیولي او باید د طا-لبانو له اصولو سره سم یې فعالیتونه پرمخ ولاړ شي.
د دې محلي رسنیو بیا فعالول په داسې حال کې پیل شوي چې د هغې مدیر سلطان علي جوادي د طا-لبانو له خوا په یو کال بند محکوم شوی او اوس په زندان کې دی.
د میزان مياشتې په پنځمه نېټه استخباراتي ځواکونو د نسيم راډيو دفتر وتړلو او د دغې رسنۍ رييس سلطان علي جوادي او له خبريالانو مجتبی قاسمي او سيف الله رضايي سره يې ونيول.
دغه کسان هغه ورځ مازدیګر شاوخوا پنځه بجې د څو ساعتونو لپاره د طا-لبانو له خوا تر توقیف وروسته خوشي شول، خو د دې رسنیو دفتر تړلی پاتې شو.
