اروپايي ټولنه: د دوحې غونډه د بامعني مذاکراتو لپاره یو مهم فرصت دی
ډید خبري اژانس: د افغانستان په چارو کې د اروپايي ټولنې ځانګړي استازي کابل ته له څو ورځني سفر وروسته ویلي، چې د دوحې ناسته د بامعنی خبرو لپاره یو مهم فرصت دی.
د افغانستان په چارو کې د اروپايي ټولنې ځانګړي استازي توماس نیکولاسن پرون په کابل کې په یوه خبري غونډه کې وویل چې د دوحې غونډه د افغانستان په اړه د بامعنی بحثونو د ترسره کولو او د ټولو خواوو د چمتووالي ښودلو لپاره یو مهم فرصت دی چی د یوې پروسې پر بنسټ د سازمان ملل لخوا رهبري کیږي.
نیکولاسن د دې حقیقت هرکلی کوي چې نور افغانان، نارینه او ښځینه به دوحې ته رابلل شي ترڅو خپلې تجربې او لیدونه شریک کړي.
هغه زیاته کړه چې د ملګرو ملتونو د راپور د اصلي موندنو او وړاندیزونو لپاره د ټولو اړخونو څخه مثبت ستاینه احساسوي.
نیکولاسن د خپلو خبرو په یوه بله برخه کې د تمویل کوونکو په ګډون او فعال حضور سره په افغانستان کې د تطبیق کوونکو شریکانو او اوسنیو چارواکو ترمنځ د لا رغنده خبرو اترو غوښتنه وکړه.
