اوتونبایوا: د زده کړو دوام به افغان نجونې نورې هم منزوي کړي
دید خبري اژانس: په افغانستان کې د ملګرو ملتونو د دفتر (یوناما) مشرې روزا اوتونبایوا د پوهنې د نړیوالې ورځې په مناسبت ویلي چې له زده کړو څخه د نجونو د محرومیت دوام به افغانستان نور هم منزوي کړي.
نن چهارشنبه( دلو ۴) د تعلیم د نړیوالې ورځې په مناسبت روزا اوتنبایوا وویل چې طا-لبان باید په دې پوه شي چې تعلیم نه یوازې یو اخلاقي مکلفیت دی بلکې د ټولنې د هوساینې او سولې لپاره هم حیاتي دی.
هغه دا هم وویل چې طا-لبان دنده لري چې د جنسیت په پام کې نیولو پرته د ټولو زده کونکو د حقونو ساتنه او ملاتړ وکړي.
اوتونبایوا زیاته کړه چې «په اوسنۍ لاره دوام کول به یوازې ټولو افغانانو ته زیان ورسوي او افغانستان به له اسلامي نړۍ او نړیوالې ټولنې څخه ګوښه وساتي».
د آغلې اوتونبایوا په وینا، تعلیم ته د ښځو او نجونو د حقونو درناوی نه یوازې د لویدیځو هېوادونو هیله ده، بلکې د اسلامي نړۍ غوښتنه هم ده.
د یوناما مشر ټینګار وکړ چې په افغانستان کې ښوونه او روزنه د هر چا له حق څخه ډیر مهم ګڼل کیږي، ځکه دا د افغانستان د راتلونکي بنسټ دی.
د هغه په وينا، د نن او سبا له ننګونو سره د مقابلې، د اقتصادي تحرک او د اقليمي بحران د اغېزو د کمولو لپاره ښوونه او روزنه ضروري ده.
مېرمن اوتونبایوا وویل «له تعلیم څخه د ښځو او نجونو د محرومیت دوام د دوام وړ نه دی، ځکه هره ورځ چې تېرېږي، د یوې هوسا او برابرې ټولنې بنسټ کمزوری کېږي».
طا-لبانو په افغانستان کې تر خپلې واکمنۍ وروسته له شپږم ټولګي څخه پورته نجونې په ښوونځي او پوهنتون کې بندې کړې دي.
تر دې مخکې د خوړو نړیوال پروګرام د پوهنې د نړیوالې ورځې په مناسبت ویلي وو چې په افغانستان کې ډېر وږي ماشومان ښوونځیو ته ځي.
دغه سازمان دا هم ویلي چې د پوهنې په نړیواله ورځ نړۍ ته دا یادونه کوي چې د ښوونځي خواړه د زده کړې لپاره اړین دي.
دا پروګرام دا مهال په ښوونځيو کې ماشومانو ته بسکټونه وېشي.
په داسې حال کې چې څه باندې دوه نیم کاله کېږي چې په افغانستان کې نجونې له زده کړو بې برخې دي، د بښنې نړیوال سازمان د پوهنې د نړیوالې ورځې په مناسبت اعلان وکړ چې افغان نجونې غواړي چې ژر تر ژره خپل ښوونځي پرانستل شي.
د بښنې نړیوال سازمان ویلي چې افغان نجونې په دې ورځ خپلې کیسې شریکوي او خپله غمرازي څرګندوي؛ ځکه چې د زده کړې اساسي حق لا هم د طالبانو لخوا تر پښو لاندې کیږي.
