مخالفینو ته د ملا یعقوب اخطار: د غونډو جوړول به تاسو ته په تاوان تمام شي
ډيډ خبري اژانس: د دفاع وزارت سرپرست ملا یعقوب مجاهد د طا-لبانو او مخالفینو د ناستو په اړه په غبرګون کې وايي، چې دا ناستې «بې ځایه» دي او د مخالفینو سیاسي جریانونو ته زیان رسوي. ښاغلي مجاهد د کوم مشخص کس یا حرکت نوم وانخیست.
د دفاع وزارت سرپرست ملا یعقوب مجاهد د دغه وزارت د یو شمېر ځانګړو ځواکونو د فراغت په مراسمو کې په مسکو او دوشنبې کې د اپوزیسیون سیاسي جریانونو وروستیو غونډو ته غبرګون وښود. نوموړي دغه غونډې بې اغېزې وبللې او زياته يې کړه، چې سياسي جريانونو ته به زيان ورسوي.
ښاغلي مجاهد د سیاسي مخالفینو وروستۍ غونډې د امنیت د خرابولو او د ګډوډۍ د رامنځ ته کولو په موخه بللې او بې بنسټه یې بللې دي.
ملا یعقوب: هغه کسان چې دلته او هلته په ډلو ټپلو د امنیت د خرابولو او ګډوډۍ لپاره ځي او دلته او هلته ګوندونه لري، دا او هغه لوري ته بې ادبه، رد او بد وایي، ټولو ته زموږ پیغام دا دی چې د افغانستان اسلامي امارت رهبري، ستاسو لپاره بخښنه اعلان کړه.
د هغه په وینا، د طا-لبانو امنیتي ځواکونه د سیاسي جریانونو په خدمت کې دي او هیڅکله به ورسره خیانت ونه کړي.
هغه زیاته کړه: موږ دا تش بې ځایه او بې ګټې اعلانونه ستاسو په ګټه نه ګڼو، په پای کې به تاسو ته زیان رسوي، او لکه څنګه چې تاسو مخکې له دې چې ملت ازمویلی او ناکام شوی یاست، هومره به مو تصویر خرابیږي او همدومره به مو بدمرغي زیاتیږي. که تاسو دا خبره واضحه کړه نو ملت به له تاسو څخه نوره کرکه او نفرت وکړي او تاسو به نور څه لاسته را نه وړئ.
په دې وروستیو کې د طا-لبانو پر ضد سیاسي جریانونو په مسکو او دوشنبه کې غونډې کړې او اوس یې د اتریش په پلازمینه ویانا کې هم په یوه غونډه کې ګډون کړی چې د یو شمېر موجوده حکومتي چارواکو غبرګونونه یې پارولي دي.
