ډید خبري اژانس: افغانستان ته له ازبکستان څخه د وارداتي برېښنا کچه ۵۰ سلنه کمه شوې ده.
د برېښنا شرکت د یکشنبې په ورځ (قوس۱۲) اعلان وکړ چې له ازبکستان څخه افغانستان ته د وارداتي برېښنا کچه د نن ورځې لپاره ۵۰ سلنه کمه شوې ده.
دغه شرکت د برېښنا د کمښت لامل د ازبکستان د برېښنا د تاسيساتو بيا رغونه بولي.
د برېښنا شرکت وايي، له ازبکستان څخه د وارداتي برېښنا په کمېدو سره، سربیره د خلم او خنجان صنعتي پارکونو او سب سټیشنونو ته، په سمنګان، پروان، کاپیسا، پنجشیر، ننګرهار، لغمان، غزني، میدان وردګو، لوګر، پکتیا او خوست ولایتونو کې هم د برېښنا د پرې کېدو کچه لوړه شوې ده.
په ورته وخت کې د برښنا شرکت د قوس په دویم کې هم اعلان کړی و، چې د ازبکستان د برېښنا د تاسیساتو د بیارغونې له امله له هغه هېواد څخه افغانستان ته د وارداتي برېښنا کپه د یوې ورځې لپاره ۵۰ سلنه کمه شوې ده.
د برېښنا شرکت دغه راز ویلي، چې په بلخ، سمنګان، بغلان، پروان، کاپیسا، پنجشیر، کابل، ننګرهار، لغمان، غزني، میدان وردګو، لوګر، پکتیا او خوست ولایتونو کې به د برېښنا د پرچاوۍ کچه لوړه شي.
افغانستان تر ډېره له ګاونډیو هېوادونو څخه پر وارداتي برېښنا تکیه کوي.
افغانستان تر ټولو ډېره برېښنا له ازبکستان او ترکمنستان څخه واردوي.
