دید خبری آژانس: د بهرنیو چارو وزارت سیاسي مرستیال شېرمحمد عباس ستانکزي د قوش تېپې کانال د لومړي فاز او دویم فاز د کار د پیل په مراسمو کې وویل چې د امو سیند له اوبو ګټه اخیستل د افغانستان حق دی. هغه له ملګرو ملتونو هم وغوښتل چې پر فلسطینیانو د اسرائیلو بریدونه ودروي.
د بهرنیو چارو وزارت سیاسي مرستیال عباس ستانکزي د چهارشنبې په ورځ (د میزان ۱۹مه) په مزارشریف کې وویل چې د افغانستان په تاریخ کې د امو سیند له اوبو نه کار اخیستل شوی او نه هم د امو سیند له اوبو نه کار اخیستل شوی دی. دا اوبه د افغانستان حق دی.
هغه زیاته کړه، که ترکمنستان، تاجیکستان او ازبیکستان د افغانستان له خوا د امو سیند له اوبو د استفادې په اړه اندېښمن وي، اسلامي امارت چمتو دی چې په دیپلوماتیکه توګه یې حل کړي.
د هغه په وينا، د طا-لبانو حکومت هڅه کوي، هغه اوبه چې د افغانستان حق دى، په سمه توګه هېواد ته راوباسي او له دې بحر څخه د ګاونډيانو حق تر پښو لاندې نه کړي.
ښاغلي ستانکزي وویل چې اسلامي امارت هڅه کوي د هیواد ټولې اوبه تر خپل کنټرول لاندې راولي.
نوموړي په پاکستان کې د مهاجرینو وروستي وضعیت او د هغوی توقیف ته په اشارې سره وویل، اسلام اباد پر اسلامي امارت د سیاسي او اقتصادي فشار په موخه افغان مهاجرین اخراجوي.
د بهرنیو چارو وزارت سیاسي مرستیال له اسلامي هېوادونو او ملګرو ملتونو وغوښتل چې پر فلسطین د اسرائیلو د برید مخه ونیسي.
په همدې حال کې د منځنۍ اسیا هېوادونو په دې وروستیو کې د قوشتپې کانال په اړه اندېښنه ښودلې ده.
