دید خبری آژانس: د بهرنیو چارو وزارت سرپرست امیر خان متقی د اتریش د آزادۍ ګوند له یوشمیر غړو سره د قونسلۍ د خدمتونو د وړاندې کولو په اړه وکتل.
د بهرنیو چارو وزارت د ویاند مرستیال ضیا احمد تکل د دوشنبې په ورځ (۳ میزان) د ایکس په ټولنیزه پاڼه کې لیکلي چې دوی په بروکسل کې د افغانانو د ستونزو د حل لپاره د قونسلګرۍ د خدمتونو د وړاندې کولو او د اسانتیاوو پر رامنځته کولو خبرې وکړې.
متقي د اتریش د ازادۍ ګوند استازو ته دا هم وویل چې «د افغانستان وضعیت له هغه څه سره ډېر توپیر لري چې په رسنیو کې ښودل شوي او ویل کېږي».
د افغانستان د بهرنیو چارو وزارت ویلي دي چې د اتریش د ازادۍ ټولنې غړو ډاډ ورکړی چې اروپا ته به د افغانستان د روان وضعیت «حقیقي انځور» وړاندې کړي.
د اتریش د ازادۍ ګوند غړو تر اوسه په دې اړه څه نه دي ویلي.
د خپرو شویو راپورونو پر بنسټ دغه ګوند په اروپا کې د مهاجرت او مسلمانانو ضد سیاستونه تعقیبوي.
د يادونې وړ ده، چې په افغانستان کې د طا-لبانو له واکمنۍ څه باندې دوه کاله تېرېږي، خو تر دې مهاله هېڅ هېواد په رسميت نه دى پېژندلى.
