کانګرس یو ځل بیا له طا-لبانو سره د امریکايي چارواکو پر ناستې نیوکه وکړه
ډید خبري آژانس: د امریکا د کانګرس د بهرنیو اړیکو د کمېټې مشر یو ځل بیا له طا-لبانو سره د امریکايي چارواکو پر ناستو نیوکه کړې او د بندېدو غوښتنه یې کړې ده.
پرون په دوحه کې له طا-لبانو سره د امریکايي چارواکو د وروستۍ ناستې په غبرګون کې مایکل مک کال وویل چې دا ناستې به «طا-لبان نورمال کړي».
د امریکا د کانګرس د بهرنیو اړیکو د کمېټې مشر هم د ښځو او بشري حقونو لپاره د امریکا د ځانګړې استازې رینا امیري د څرګندونو په غبرګون کې ویلي، چې د افغانستان خلکو له امریکا نه له طا-لبانو سره د اړیکو غوښتنه کړې ده.
مک کال زیاته کړه، چې د افغانستان لپاره د مېرمن امیري له ټاکل کېدو راهیسې تر اوسه طا-لبانو د ښځو او نجونو پر وړاندې ډېر ظالمانه فرمانونه صادر کړي دي.
د هغه په وينا، له طا-لبانو سره د امريکايي چارواکو ناستې هم د افغانستان له ښځو او نجونو سره مرسته نه ده کړې.
امیري د قطر په دوحه کې د امریکايي استازو او طا-لبانو تر منځ له دوه ورځنۍ ناستې وروسته په یو لړ ټویټونو کې لیکلي چې «له طا-لبانو سره د مستقیمو خبرو پر اړتیا د افغانانو او د بشري حقونو د مدافعینو له پراخ ټینګار وروسته»، په دې غونډه کې برخه واخیسته.
د هغې دغه څرګندونې له پراخو غبرګونونو سره مخ شوې او د هېواد یو شمېر افغانانو په تېره بیا ښځو ویلي، چې له مېرمن امیري څخه یې دا ډول غوښتنه نه ده کړې.
