د کار نړیوال سازمان: د ویښتانو د سالونونو تړل د «ښځو په کارموندنه کې د پام وړ کمښت» لامل کیږي.
ډید خبري اژانس: د کار نړیوال سازمان په افغانستان کې د ویښتانو په سالونونو بندیز ته په اشارې سره ویلي چې دغه بندیز به د ښځو په کار کې د پام وړ کموالی راولي.
د کار نړیوال سازمان (ILO) د ویښتو په سالونونو کې د ښځو کار کولو بندیز ته په اشارې سره رویټرز ته وویل چې دا بندیز به د ښځو په کار کې د «پام وړ» کمښت لامل شي.
د کار نړیوال سازمان وايي، په افغانستان کې د غربي ملاتړي حکومت د واکمنۍ پر مهال په رسمي کاري ځواک کې د ښځو ونډه ۲۳ سلنه وه.
له بلې خوا په افغانستان کې د ملګرو ملتونو د سرمنشي ځانګړې استازې روزا اوتنبایوا د دغه بندیز په اړه وویل: دا په غیر متناسب ډول پر ښځینه متشبثینو اغیز کوي، چې د انعطاف، د بې وزلۍ د کمولو او د اقتصادي ودې په برخه کې یو خنډ دی.
د اټکلونو له مخې، د ۶۰,۰۰۰ څخه زیاتې ښځې احتمال لري چې خپلې دندې له لاسه ورکړي او ۱۲,۰۰۰ د کاسمیټکس سوداګرۍ وتړل شي، چې دا به د پخوانۍ کړکیچ اقتصاد نور هم فشار راوړي.
د يادونې وړ ده چې د طا-لبانو وياند تر دې دمه د دې غوښتنې په اړه څه نه دي ويلي.
