یونیسف: په افغانستان کې نږدې لس زره ښځینه کارکونکي تر مالي پوښښ لاندې راغلي دي
ډید خبري اژانس: په افغانستان کې د ملګرو ملتونو د ماشومانو د وجهي صندوق (یونیسف) د روغتیايي پروګرامونو مشره وايي، چې د دغه سازمان په مالي ملاتړ شاوخوا لس زره ښځینه کارکوونکې تر پوښښ لاندې راغلې دي.
په افغانستان کې د یونیسف د روغتیايي پروګرامونو مشرې فیروز شفیق په خپل ټوېټر لیکلي چې دا ښځې د هېواد په کچه په روغتیايي مرکزونو او ټولنو کې کار کوي چې د افغان ښځو او ماشومانو د ژوند ژغورونکي خدمات وړاندې کړي.
د هغه په وينا، د دغو ښځو د کار د دوام لپاره پيسې د اسيا پراختيايي بانک، نړيوال بانک او يونيسف له خوا ورکول کېږي.
هغه وویل چې اوس مهال په ټول افغانستان کې ۲۰ میلیونه وګړي لومړنیو او ثانوي روغتیايي خدمتونو ته لاس رسی لري.
خو د هغه په وينا، دا کار د روغتيايي کارکوونکو په ځانګړې توګه د ښځو په ملاتړ، د اکمالاتو لړۍ فعاله ساتلو او د روغتيايي مرکزونو او روغتونونو په پرانيستلو سره شونې ده.
