یوناما: طا-لبان منزوی او مستبد پاتې دي او د هغوی پیژندل ناشوني دي
ډید خبري اژانس: د ملګرو ملتونو د سرمنشي ځانګړي استازي او د یوناما مشر د امنیت شورا په غونډه کې ویلي، چې طا-لبان به تر هغو په رسمیت ونه پیژني، څو پر دوی بندیزونه لیرې شوي نه وي.
د افغانستان لپاره د ملګرو ملتونو استازې پرون د امنیت شورا په غونډه کې وویل، تر هغې چې د ښځو پر حقونو د دې ډلې بندیزونه لرې نه شي، د نړیوالې ټولنې لپاره دا تقریباً ناشونې ده چې طا-لبان په رسمیت وپیژني.
روزا اوتونبایوا د امنیت شورا ته وویل چې ملګري ملتونه لا هم په دې سازمان کې د ښځو پر کار کولو د بندیزونو له امله په افغانستان کې له یوه پیچلي وضعیت سره مخ دي.
تېر اپرېل کې طا-لبانو پر افغان مېرمنو له نادولتي موسسو سره له همکارۍ منع کړل.
هغه وویل: زه د هغو خنډونو په اړه روښانه یم چې دوی د احکامو او محدودیتونو سره په ځان کې اچولي دي، په ځانګړې توګه د ښځو او نجونو لپاره. موږ دوی ته وویل چې تر هغه چې دا حکمونه پر ځای وي، د دوی حکومت د نړیوالې ټولنې د غړو له خوا په رسمیت پېژندل تقریبا ناشونی دی.
هغه زیاته کړه: اوسني چارواکي د دغه بندیز په اړه هیڅ وضاحت نه ورکوي او نه یې د لغوه کیدو ضمانت ورکوي.
اوتونبایوا یادونه وکړه چې ښځینه ملي کارکونکي به د نارینه وو پر ځای نه وي.
هغه له طا-لبانو وغوښتل چې دغه بندیزونه دې لغوه کړي څو ملګري ملتونه د افغانستان له خلکو سره خپلو بشپړو مرستو ته دوام ورکړي.
د یوناما مشر د خپلو خبرو په یوه برخه کې وویل: د طا-لبانو رژیم انزوا او استبدادي پاتې دی. د اوسني حکومت جوړښت په بشپړه توګه نارینه دی او تقریباً په بشپړه توګه د طا-لبانو له پښتون او کلیوالي سیاسي بنسټ څخه جوړ شوی دی.
په همدې حال کې طا-لبانو د ملګرو ملتونو د دې دریځ په غبرګون کې اعلان کړی چې د دغه سازمان غوښتنې د اسلام خلاف دي.
