یونیسف: په ۲۰۲۷ کال کې به په افغانستان کې له څلورو ملیونو څخه ډیر ماشومان د خوارځواکۍ درملنې ته اړتیا ولري
د دید خبري اژانس: د ملګرو ملتونو د ماشومانو وجهي صندوق (یونیسف) په ۲۰۲۷ کال کې په افغانستان کې د خوارځواکۍ درملنې ته اړتیا لرونکو ماشومانو په شمیر کې د اندیښنې وړ زیاتوالي راپور ورکړی دی.
یونیسف خبرداری ورکړی چې په ۲۰۲۷ کال کې به په افغانستان کې د خوارځواکۍ بحران نور هم خراب شي. د سازمان د اټکلونو له مخې، له څلورو ملیونو څخه ډیر ماشومان به د خوارځواکۍ درملنې ته اړتیا ولري او له یو ملیون څخه ډیر ماشومان به د دې ستونزې له سختې بڼې سره مخ شي؛ یو داسې وضعیت چې پکې فقر او د کورنیو لخوا د کافي خوړو چمتو کولو نشتوالی مهم عوامل دي.
په ننګرهار ولایت کې یو طبي رضاکار، الفت الله محب زی هم فقر او د عاید سرچینو نشتوالی د ماشومانو په منځ کې د خوارځواکۍ د خپریدو اصلي عوامل ګڼي.
هغه دوام ورکړ چې په څو سیمو کې د هغه میاشتنۍ سروې ښیي چې ډیری کورنۍ د اقتصادي ستونزو له امله د خپلو ماشومانو لپاره د کافي او مغذي خوړو له چمتو کولو څخه محرومې دي.
ډاکټر احمدالدین معارج، چې د کابل د طبي علومو پوهنتون پخوانی پروفیسور دی، هم د خوړو کمښت، د معدې ناروغۍ، او د مختلفو عمرونو ماشومانو د تغذیې اړتیاوو په اړه د والدینو ناپوهي د خوارځواکۍ د عواملو په توګه یادوي.
د یونیسف د نوي وړاندوینې له مخې، د روغتیا خدماتو پراخول او د زیان منونکو کورنیو ملاتړ کولی شي د خوارځواکۍ د پایلو کمولو او په افغانستان کې د ماشومانو د روغتیا د خرابیدو مخنیوي کې مهم رول ولوبوي.