د دید خبري اژانس: د بشري حقونو څار خبرداری ورکړی چې د افغان کډوالو د جبري راستنیدو په اړه د طالبانو د حکومتي چارواکو سره د فرانسې تخنیکي خبرې اترې کولی شي د دوی ژوند او امنیت په جدي توګه له خطر سره مخ کړي.
د فرانسې د بهرنیو چارو وزارت اعلان کړی چې د خبرو اترو هدف د هغو افغان اتباعو د شړلو اسانتیا برابرول دي چې قانوني استوګنه نلري او هغه کسان چې د ملي امنیت لپاره ګواښ ګڼل کیږي. دا په داسې حال کې ده چې جرمني هم د تیر کال راهیسې ۲۶۳ افغان اتباع شړلي دي.
د بشري حقونو څار ټینګار کړی چې طالبانو په ۲۰۲۱ کال کې واک ته له رسیدو راهیسې د خلکو، په ځانګړې توګه د ښځو او نجونو اساسي حقونه په جدي توګه محدود کړي دي. د هغو خلکو د توقیف او شکنجې راپورونه هم شتون لري چې په زوره افغانستان ته راستانه شوي دي.
سازمان، د جنسیت پر بنسټ او سیاسي ځورونې له لارې د بشري ضد جرمونو په تور د نړیوالې جنایي محکمې د طالبانو د مشر او د ډلې د یو شمیر لوړ پوړو چارواکو د نیولو امرونو ته په اشارې سره، له فرانسې څخه غوښتنه کړې چې د افغانانو لپاره د هر ډول شړلو پروګرام ودروي.
د بشري حقونو د څار ادارې ټینګار کړی چې تر هغه چې په افغانستان کې د بشري حقونو د پراخو سرغړونو خطر شتون ولري، هیڅ هیواد باید په زور سره افغان کډوال بیرته دې هیواد ته ونه لیږي.