د دید خبري اژانس: د روسیې د بهرنیو چارو وزارت اعلان وکړ چې له کابل سره د مساوي همکارۍ او په نړیوال اقتصادي سیسټم کې د افغانستان د ادغام لپاره هیڅ بدیل نشته.
په مسکو کې د افغانستان په اړه د اتم مسکو فرمټ غونډې وروسته، د روسیې د بهرنیو چارو وزارت اعلان وکړ چې ګډونوالو له کابل سره د دوه اړخیزو ګټورو همکاریو د لارې په دوام او په نړیوالو اقتصادي اړیکو کې د افغانستان د ادغام ټینګار وکړ.
د وزارت په اعلامیه کې ویل شوي چې ګډونوالو یو ځل بیا له نړیوالې ټولنې وغوښتل چې د افغانانو لپاره منظم بشري مرستې ډاډمنې کړي او د بشري مرستو د سیاسي کولو د مخنیوي اړتیا باندې ټینګار وکړ.
د روسیې د بهرنیو چارو وزارت د مسکو فرمټ د یو باوري څو اړخیز پلیټ فارم په توګه تشریح کړ چې پکې سیمه ایز هیوادونه د افغان مسلو په اړه خپل نظرونه او عملي طریقې همغږي کوي.
د مسکو فرمټ اتمه غونډه د روسیې، افغانستان، هند، ایران، قزاقستان، قرغزستان، چین، پاکستان، تاجکستان او ازبکستان استازو او لوړ پوړو چارواکو ګډون درلود.
د بهرنیو چارو سرپرست وزیر امیر خان متقي په مشرۍ افغان پلاوي په دې غونډه کې ګډون وکړ. د بیلاروس او مصر پلاوي هم د میلمنو په توګه په دې غونډه کې ګډون وکړ.
د روسیې د بهرنیو چارو وزیر سرګي لاوروف غونډه پرانیسته او په څنګ کې یې له امیر خان متقي سره جلا غونډه وکړه.
د روسیې د بهرنیو چارو وزارت په وینا، دواړو خواوو د دوه اړخیزو همکاریو د پراختیا او همدارنګه د نړیوالو او سیمه ایزو میکانیزمونو دننه د همکارۍ په اړه بحث وکړ.