د بې عدالتۍ ۲۵ کاله؛ د افغانستان د جګړې قربانیان لا هم عدالت ته انتظار باسي
د دید خبري اژانس: د بشري حقونو څار اداره وايي چې د افغان جګړې له پیل څخه ۲۵ کاله وروسته، د جنګي جرمونو او بشري حقونو سرغړونو ډیری قربانیان لا هم عدالت او تاوان نه دی ترلاسه کړی.
سازمان په یوه راپور کې اعلان وکړ چې د امریکا ځواکونه د افغان جګړې په جریان کې د شکنجې، بندیانو سره د ناوړه چلند او د ملکي وګړو د وژنې له تورونو سره مخ دي، مګر په ډیری مواردو کې، د دې پیښو عاملین د اغیزمن قضایي تعقیب سره مخ شوي ندي.
د بشري حقونو د څار ادارې مشرې، پاتریشیا ګاسمن وویل: “۲۵ کاله تیریږي، خو هغه افغانان چې د امریکا په توقیف ځایونو کې شکنجه شوي او د هغو کسانو کورنۍ چې په غلطه توګه وژل شوي دي، لا هم د تاوان ترلاسه کولو لپاره کومه روښانه لاره نه لري.”
راپور د متحده ایالاتو او ایتلافي ځواکونو لخوا د ملکي وګړو د وژنې قضیو ته هم اشاره کوي. د بشري حقونو څار اداره وايي چې ځینې امریکایي سرتیري په ځانګړو قضیو کې محاکمه شوي، مګر ډیری نورې قضیې هیڅکله قضایي پایلې ته نه دي رسیدلي.
سازمان په طالبانو او نورو وسله والو ډلو هم تور لګولی چې په ملکي وګړو بریدونه کوي، د ښځینه چارواکو او خبریالانو وژنه کوي، او په استوګنیزو سیمو کې چاودیدونکي توکي کاروي.
د بشري حقونو د څار سازمان د ۲۰۲۵ کال په اکتوبر کې د افغانستان لپاره د ملګرو ملتونو د خپلواک تحقیقاتي میکانیزم د جوړولو هرکلی وکړ او د ټولو ښکیلو خواوو لخوا یې د تیرو او روانو جرمونو د سمدستي څیړنې غوښتنه وکړه.
ګاسمن ټینګار وکړ چې “د وخت تیریدل باید خلک له عدالت، تاوان او د دوی د حقونو پیژندلو څخه محروم نه کړي.”