د دید خبري اژانس: د پاکستان د احصایې د ادارې د وروستیو احصایو له مخې، د روان مالي کال په لومړیو دریو میاشتو کې د هیواد سوداګریز کسر ۱۵ سلنه زیات شوی او ۱۰.۷۹ ملیارد ډالرو ته رسیدلی دی.
د دې احصایو له مخې، پاکستان د ۲۰۲۶ کال په سپتمبر کې شاوخوا ۶.۵ ملیارد ډالر توکي وارد کړي او ۲.۹۴ ملیارد ډالر توکي صادر کړي دي. په دې توګه، د هیواد میاشتنی سوداګریز کسر ۳.۵۶ ملیارد ډالرو ته رسیدلی، چې د اګست په پرتله ۸ سلنه او د تیر کال د سپتمبر په پرتله ۶ سلنه زیاتوالی دی.
د سپتمبر په میاشت کې د پاکستان واردات د تیرې میاشتې په پرتله ۱۲ سلنه او د تیر کال د ورته مودې په پرتله ۱۱ سلنه زیات شوي دي. په ورته وخت کې، د هیواد صادرات هم د اګست په پرتله ۱۶ سلنه او د تیر کال د سپتمبر په پرتله ۱۸ سلنه زیات شوي دي.
په ټولیز ډول، د روان مالي کال په لومړیو دریو میاشتو کې د پاکستان واردات ۱۹.۲۱ ملیارد ډالرو ته رسیدلي، چې ۱۳ سلنه زیاتوالی ښیي. د هیواد صادرات هم په ورته موده کې ۱۱ سلنه زیات شوي او ۸.۴۲ ملیارد ډالرو ته رسیدلي دي.
د صادراتو د ودې سره سره، د وارداتو چټک زیاتوالي د پاکستان د وارداتي او صادراتي توکو د ارزښت ترمنځ واټن پراخ کړی دی، چې د روان مالي کال په پیل کې د هیواد سوداګریز کسر پراخ کړی دی.