د دید خبري اژانس: د هند د بهرنیو چارو وزارت اعلان کړی چې د دغه هېواد د بهرنیو چارو مرستیال وزیر ویکرام میسري د ملګرو ملتونو د عمومي اسامبلې د غونډې په څنډه کې د افغانستان لپاره د ملګرو ملتونو د سرمنشي له ځانګړې استازې رباب فاطمه سره ولیدل او په افغانستان کې د بشري وضعیت په اړه یې نظرونه تبادله کړل.
د هند د بهرنیو چارو وزارت ویاند رندیر جیسوال په ټولنیزه شبکه ایکس کې یوه پوسټ خپور کړ چې میسري په دې غونډه کې د افغانانو د بشري اړتیاوو د حل کولو د دوام پر اړتیا ټینګار وکړ.
د جیسوال په وینا، د هند د بهرنیو چارو مرستیال وزیر هم په افغانستان کې د ملګرو ملتونو د مرستندویه ماموریت (یوناما) د رول ستاینه وکړه او په افغانستان کې یې د ملګرو ملتونو سره د نوي ډیلي پر دوامداره همکارۍ ټینګار وکړ.
دا غونډه په داسې وخت کې وشوه چې افغانستان د جدي بشري او اقتصادي ننګونو سره مخ دی او نړیوال سازمانونه د هیواد د خلکو د پراخو اړتیاوو په اړه خبرداری ورکوي.
په وروستیو کلونو کې، هند د افغانستان خلکو ته د بشري مرستو پر دوام ټینګار کړی او په دې برخه کې یې د ملګرو ملتونو سره همکاري د افغانستان د وضعیت په اړه د خپل چلند یوه برخه ګڼلې ده.