د دید خبري اژانس: د آسیا پراختیایي بانک (ADB) رییس، ماساتو کانډا، د افغانستان خلکو ته د بانک د ملاتړ د پراختیا اعلان وکړ، ویې ویل چې د ادارې نوې تګلاره د اړینو خدماتو دوام، د ټولنو د انعطاف پیاوړتیا او د ژوند لپاره د ډیرو فرصتونو رامینځته کولو باندې تمرکز کوي.
کانډا په ټولنیز شبکه “ایکس” کې لیکلي چې د آسیا پراختیایي بانک له ۲۰۲۲ کال راهیسې د خپلو باوري شریکانو له لارې په افغانستان کې د خوړو خوندیتوب، روغتیا او تعلیم ملاتړ کړی دی.
هغه زیاته کړه چې بانک د بشري اړتیاوو د زیاتوالي او په افغانستان کې د شرایطو د نازکیدو سره د مرستې چمتو کولو ته ژمن دی.
د آسیا پراختیایي بانک رییس ټینګار وکړ چې د بانک مرستې به د سختې څارنې او حساب ورکولو سره چمتو شي، او ځانګړې پاملرنه به هغو ښځو ته ورکړل شي چې له دې پروګرامونو څخه ګټه پورته کوي، په ځانګړې توګه د ښځو په مشرۍ پروژو له لارې.