طالبان: په کنړ او پکتیکا باندې د پاکستان بریدونه به بې ځوابه پاتې نشي

د دید خبري اژانس: د طالبانو د حکومت ویاند ذبیح الله مجاهد په کنړ او پکتیکا ولایتونو باندې د پاکستاني پوځ هوایي بریدونه وغندل او هغه یې د “جنګي جرم” تکرار وباله.

مجاهد د دوشنبې په ورځ، د سنبلې په ۳۰مه وویل چې “پاکستاني پوځي کړیو” په افغانستان کې د امنیتي ناکامیو څخه د عامه افکارو د پام اړولو په هدف بریدونه پیل کړي دي.

د طالبانو ویاند ټینګار وکړ چې دا بریدونه “بې ځوابه پاتې نشي” او کابل به “مناسب ځواب” ورکړي.

په کنړ باندې د برید د تلفاتو په اړه، هغه وویل چې په پیښه کې یوه ښځه او دوه نارینه ووژل شول، او دوه نورې ښځې او دوه نارینه ټپیان شول.

مجاهد زیاته کړه چې په پکتیکا ولایت کې په یوه هوایي برید کې یو کور او یو محلي دوکان هم په نښه شو، خو دې پیښې هیڅ مرګ ژوبله ونه کړه.