د دید خبري اژانس: پاکستان اعلان کړی چې چمتو دی له افغانستان سره خپلې پولې پرانیزي او د سوداګرۍ لارې او سیمه ییز اتصال په توګه یې وکاروي، خو دا یې د افغانستان له خاورې څخه د ترهګریزو فعالیتونو بشپړ بندولو ته مشروط کړی دی.
د پاکستان د بهرنیو چارو وزارت ویاند سجاد حیدر خان د پنجشنبې په ورځ په یوه اونیزه خبري غونډه کې وویل چې “مسؤلیت د افغان لوري پر غاړه دی.” هغه ادعا وکړه چې د چین، ترکیې او قطر لخوا د دواړو هیوادونو ترمنځ د تاوتریخوالي د کمولو لپاره د منځګړیتوب هڅې تر اوسه ناکامې شوې دي.
پاکستاني چارواکي وویل چې اسلام آباد افغانستان د امنیتي مسلو په اړه د همکارۍ نه کولو تورنوي او د پولو پرانیستل د خپلو امنیتي اندیښنو د حل کولو پورې مشروط ګڼي.