د دید خبري اژانس: د ملګرو ملتونو د بشري حقونو عالي کمیشنر، ولکر تورک، خبرداری ورکړی چې د افغانانو وضعیت مخ په خرابېدو دی او نړیواله ټولنه د دې بحران په وړاندې چوپه خوله پاتې شوې ده.
تورک وویل چې د طالبانو لخوا د زده کړې، کار، د تګ راتګ آزادۍ او په عامه ژوند کې د ښځو او نارینه وو د ګډون په اړه پراخ محدودیتونه دوام لري. د ملګرو ملتونو په وینا، د روان کال په لومړۍ نیمایي کې په افغانستان کې لږترلږه ۴۴۹ ښځې او نارینه په فیزیکي توګه مجازات شوي دي.
هغه ټینګار وکړ: “نن ورځ، په افغانستان کې د ډیری خلکو وضعیت له بد څخه بدتر کیږي.”
د ملګرو ملتونو د بشري حقونو عالي کمیشنر همدارنګه له ۲۰۲۱ کال راهیسې د دوه ملیون څخه زیاتو افغان نجونو او ښځو د ثانوي او لوړو زده کړو څخه د محرومیت، د ښځو د حقونو په اړه د نورو محدودیتونو، د رسنیو د ځپلو او د مذهبي لږکیو د حقونو د سرغړونو په اړه اندیښنه څرګنده کړه، او دا محدودیتونه یې د ښځو او نجونو په وړاندې “جنسي توپیر” وبلل.
په ورته وخت کې، له ګاونډیو هیوادونو څخه د افغانانو جبري راستنیدل دوام لري. د ملګرو ملتونو د کډوالو عالي کمیشنرۍ په وینا، له ۴۰۰،۰۰۰ څخه ډیر افغانان چې ډیری یې له ایران او پاکستان څخه په زوره افغانستان ته راستانه شوي دي.
تورک په افغانستان کې د ۲۱.۹ ملیون خلکو ته په اشارې سره وویل، “زه په ټولو هیوادونو غږ کوم چې خپل اقدامات بیاکتنه وکړي او د ځوریدلو خلکو ژوند ته لومړیتوب ورکړي.”