د دید خبري اژانس: سعودي عربستان او فرانسې په یوه ګډه اعلامیه کې د خپلواک فلسطیني دولت د جوړولو لپاره په خپل کلک ملاتړ ټینګار کړی او د لبنان له خاورې څخه د اسراییلو د بشپړ وتلو غوښتنه کړې ده.
دا اعلامیه د سعودي ولیعهد محمد بن سلمان د فرانسې د رسمي سفر په پای کې او د فرانسې له ولسمشر امانویل مکرون سره د هغه له لیدنې وروسته خپره شوه. دواړو خواوو د سعودي-فرانسې د ستراتیژیکو ملګرتیا شورا لومړۍ غونډه هم وکړه.
د فلسطین په اړه، ریاض او پاریس د ۱۹۶۷ کال د پولو دننه د فلسطینانو د خپلواک دولت د جوړولو حق د کمزوري کولو لپاره هر ډول هڅې رد کړې او د اسراییلو د میشت ځایونو د تاوتریخوالي د پای ته رسولو غوښتنه یې وکړه.
د لبنان په اړه، دواړو هیوادونو د ملګرو ملتونو د امنیت شورا د ۱۷۰۱ پریکړه لیک په بشپړ پلي کولو هم ټینګار وکړ او د لبنان له ټولې خاورې څخه د اسراییلو د وتلو غوښتنه یې وکړه.
فرانسې او سعودي عربستان د ایران د اټومي پروګرام په اړه د خبرو اترو له لارې د حل لارې ته د رسیدو پر اړتیا هم ټینګار وکړ، ویې ویل چې سیمه ایز ثبات باید د هیوادونو د حاکمیت، نړیوال قانون او ډیپلوماتیکو حل لارو پر بنسټ وي.