د دید خبري اژانس: د هند د بهرنیو چارو وزارت اعلان کړی چې نوی ډیلی هڅه کوي چې له افغانستان سره په مختلفو برخو کې خپلې تاریخي او اوږدمهاله اړیکې پراخې کړي.
د هند د بهرنیو چارو وزارت ویاند، راندیر جیسوال، په یوه مطبوعاتي کنفرانس کې وویل چې د دواړو هیوادونو ترمنځ وروستیو تعاملاتو د پراختیا، سوداګرۍ او سیمه ایزو اړیکو په برخو کې د همکارۍ په پیاوړتیا کې مرسته کړې ده.
هغه زیاته کړه چې هند او افغانستان تاریخي او اوږدمهاله اړیکې لري او نوی ډیلی به هڅه وکړي چې دا اړیکې په مختلفو سکتورونو کې پراخې کړي.
د جیسوال په وینا، په تیر کال کې، د دواړو هیوادونو د چارواکو ترمنځ ګڼ شمیر غونډې او اړیکې ترسره شوې دي، چې د دوه اړخیزو همکاریو د زیاتوالي لامل شوي دي.
په وروستیو غونډو کې، د بشري مرستو، پراختیایي همکارۍ، سوداګرۍ، تعلیم، روغتیا او سیمه ایزو اړیکو په ګډون مسلو بحث شوی دی.
د هند د بهرنیو چارو وزارت هم د سیمه ایز امنیت د ډاډمن کولو پر اهمیت ټینګار کړی او ویلي یې دي چې د افغانستان خاوره باید د بل هیواد پر وړاندې د عملیاتو لپاره ونه کارول شي.