د دید خبري اژانس: د برېښنا شرکت اجرایوي رییس د ازبکستان د تخنیکي مقرراتو د څانګې له مشر سره په لیدنه کې د افغانستان د برېښنا شبکې د تخنیکي ظرفیت د ښه کولو لپاره د دغه هېواد د همکارۍ غوښتنه وکړه. دواړو لورو د نړیوالو معیارونو د پلي کولو، د لابراتوارونو د معیاري کولو او د کارمندانو د تخصصي روزنې په اړه بحث وکړ.
برېښنا شرکت اعلان وکړ چې د شرکت اجرایوي رییس ملا عبدالحق همکار د اسد په ۱۰مه د ازبکستان د وزیرانو شورا د تخنیکي مقرراتو د څانګې له مشر اکمل جومانظروف سره وکتل او د افغانستان د برېښنا سکتور د تخنیکي ظرفیت د ښه کولو لپاره یې د دغه هېواد د همکارۍ غوښتنه وکړه.
په مطبوعاتي اعلامیه کې راغلي چې دواړو لورو د تخنیکي معیارونو د پلي کولو، د ازموینې لابراتوارونو د ظرفیت لوړولو، د نړیوالو معیارونو پر بنسټ د تجهیزاتو اندازه کولو او د ګرځنده لابراتوارونو د جوړولو په اړه بحث وکړ، چې د برېښنا په وینا، کولی شي د برېښنا شبکې کې د تخنیکي ستونزو د پیژندلو او حل کولو پروسه ګړندۍ او دقیقه کړي.
د ازبکستان د تخنیکي مقرراتو څانګې هم خپل چمتووالی څرګند کړ او ژمنه یې وکړه چې له افغانستان سره به په تخنیکي او معیاري کولو برخو کې همکاري وکړي.
غونډې د دوامداره همکارۍ پراخولو، د تخنیکي تجربو تبادلې، د نړیوالو معیارونو پلي کولو، او د بریښنا سکتور د کیفیت او اعتبار ښه کولو باندې ټینګار وکړ.
د کورني بریښنا تولید د ټیټې کچې له امله، افغانستان په پراخه کچه د ګاونډیو هیوادونو څخه د انرژۍ وارداتو پورې تړلی دی، او د خپلې بریښنا اړتیاوو څخه ۷۵ سلنه له ازبکستان او تاجکستان څخه ترلاسه کوي.