د دید خبري اژانس: د پاکستان په بېلابېلو برخو کې په تېره یوه میاشت کې د موسمي بارانونو له امله لږ تر لږه ۱۰۷ کسان مړه او ۳۴۴ نور ټپیان شوي دي. د هېواد چارواکو د جولای له ۲۹مې راهیسې د بارانونو د نوې څپې پیل او د سختو بارانونو له امله د سیلابونو او پیښو د رامنځته کېدو احتمال هم اعلان کړی دی.
د پاکستان د طبیعي پیښو د مدیریت د ملي ادارې د راپور له مخې، په خیبر پښتونخوا کې د ۵۵ کسانو د مړینې تر ټولو لوړه شمېره ثبت شوې، ورپسې پنجاب کې ۳۶ کسان وژل شوي دي.
په مړو شویو کې ۴۷ ماشومان، ۳۷ نارینه او ۲۳ ښځې شاملې دي. رسمي احصایې ښيي چې شاوخوا ۵۷ سلنه قربانیان د کورونو د نړېدو له امله او ۱۸ سلنه نور د سیلابونو له امله مړه شوي دي.
د ټولو ۳۴۴ ټپیانو له ډلې څخه ۲۴۷ یې په پنجاب او ۷۸ یې په خیبر پښتونخوا کې ثبت شوي دي. ډیری دا خلک د خپلو کورونو د چتونو او دیوالونو د نړېدو له امله ټپیان شوي دي.
په عین حال کې، د پاکستان د هوا پېژندنې ادارې خبرداری ورکړی چې د جولای له ۲۹مې نیټې څخه به د موسمي بارانونو نوې څپه پیل شي، او د خیبر پښتونخوا، اسلام آباد او پنجاب په ځینو برخو کې ممکن درانه بارانونه وشي.
پاکستاني چارواکو له خلکو غوښتي چې په راتلونکو ورځو کې احتیاطي تدابیر ونیسي او د هوا خبرداری او د مرستندویه ادارو لارښوونې په جدي توګه واخلي.