د خوړو نړیوال پروګرام غزې ته د مرستو پراخ کمښت اعلان کړ
د دید خبري اژانس: د خوړو نړیوال پروګرام اعلان وکړ چې د مالي سرچینو نشتوالي سازمان دې ته اړ کړی چې د غزې اوسیدونکو ته خپلې نغدي او خوراکي مرستې کمې کړي.
د خوړو نړیوال پروګرام خبرداری ورکړ چې که چیرې اړینې مرستې سمدلاسه چمتو نشي، نو د اکتوبر څخه به اړ شي چې د غزې اوسیدونکو ته خپلې بشري مرستې په پراخه کچه کمې کړي.
د ملګرو ملتونو ادارې اعلان وکړ چې دوی هره میاشت د غزې شاوخوا ۱.۵ ملیون خلکو ته د خوراکي توکو، اوړو، ډوډۍ، ګرمو خوړو او نغدي مرستو له لارې مرستې چمتو کوي، چې د سیمې د نفوس له ۷۰ سلنې څخه ډیر دي.
د خوړو نړیوال پروګرام ټینګار وکړ چې د معیشت د سقوط او د بیکارۍ کچه له ۸۰ سلنې څخه زیاته شوې، په غزه کې ډیری کورنۍ د خوراکي مرستو ترلاسه کولو پرته خپلې لومړنۍ اړتیاوې نشي پوره کولی.
د راپور له مخې، د خوړو نړیوال پروګرام د روان کال تر پایه پورې په غزه او لویدیځه غاړه کې د خپلو عملیاتو د دوام لپاره له ۴۲۰ ملیون ډالرو څخه ډیرو تمویل ته اړتیا لري.
د بودیجې نشتوالي له امله لا دمخه د ۷۵،۰۰۰ خلکو سره نغدي مرستې ۲۵ سلنه کمې شوې دي او شاوخوا ۲۲۰،۰۰۰ کورنیو ته د خوراکي توکو راشن نیمایي ته راټیټ شوی دی.
سازمان خبرداری ورکړی چې که نوې مرستې ترلاسه نشي، نو د اکتوبر له میاشتې څخه به ډیر سخت کمښتونه پلي شي.
ملګري ملتونه دا هم اټکل کوي چې شاوخوا ۱.۴ ملیون خلک، چې د غزې د نفوس ۶۷ سلنه سره برابر دي، د بحران په کچه یا له هغه څخه هم ډیر د خوراکي توکو له شدید کمښت سره مخ دي.