د دید خبري اژانس: د کندهار د والي او د نورو ولایتونو د ځینو لوړ پوړو حکومتي او امنیتي چارواکو ترمنځ غونډه وشوه. په دې غونډه کې د طالبانو د رهبر د امرونو د پلي کولو په اړه بحث وشو.
د جنوبي سیمې د لوړ پوړو طالبانو د چارواکو غونډه په کندهار کې وشوه
د کندهار د ولایتي ادارې له خوا نن (جمعه، د اسد ۲مه) د خپرې شوې مطبوعاتي اعلامیې له مخې، دا غونډه د کندهار د طالبانو د والي ملا شیرین اخند په مشرۍ وشوه او په کې د کندهار، زابل، ارزګان او دایکندي ولایتونو والیانو، امنیتي قوماندانانو، د قول اردوګانو قوماندانانو، د استخباراتو رئیسانو او د پوځي محکمو رئیسانو ګډون درلود.
په دې غونډه کې د طالبانو د رهبر د امرونو د پلي کولو، د ښه امنیت د تامین، د ځمکو د غصب مخنیوي، د کښت، قاچاق، د مخدره توکو د پیرود او پلور مخنیوي، سوالګرۍ مخنیوي او د امنیتي او تصفیوي کمېسیونونو پورې اړوند مسلو په اړه بحث وشو.
په دې غونډه کې د نرخونو کنټرول، خلکو ته د مرستې رسولو، په ښارونو او ولسوالیو کې د پوهنې پیاوړتیا، له خلکو سره د اړیکو ښه کولو، د امنیتي او ملکي چارواکو ترمنځ د همغږۍ زیاتوالي او د طالبانو په ګټه د خلکو په منځ کې د مثبت ذهنیت رامینځته کولو په اړه هم بحث وشو او په دې برخه کې یو شمېر پریکړې وشوې.