د دید خبري اژانس: د ملګرو ملتونو پراختیایي پروګرام اعلان وکړ چې په مزار شریف کې د میوو د پروسس شرکت ملاتړ د ۳۰۰ ښځو د دندو د ساتلو سربیره د نوي کاري فرصتونو د رامینځته کیدو او زرګونو بزګرانو د ملاتړ لامل شوی دی.
په مزار شریف کې د ښځو لپاره د ۳۰۰ کاري فرصتونو ملاتړ
“الکسانډر ډکرو”، د ملګرو ملتونو د پراختیایي پروګرام مدیر، په افغانستان کې د خصوصي سکتور او کارموندنې لپاره د سازمان د دوامداره ملاتړ په ټینګار سره، اعلان وکړ چې په مزار شریف ښار کې د ملاتړ پروژې پلي کول، د سلګونو کاري فرصتونو د ساتلو سربیره، د نویو دندو د رامینځته کیدو او د کرنې سکتور د اکمالاتي زنځیرونو د پیاوړتیا لپاره هم اساس برابر کړی دی.
په مزار شریف کې د میوو د پروسس کولو له یوې کمپنۍ سره د لیدنې پر مهال، هغه وویل چې د ملګرو ملتونو د پراختیایي پروګرام ملاتړ د دې اقتصادي کمپلیکس لپاره د ۴۰۰ کاري فرصتونو د ساتنې لامل شوی، چې له دې جملې څخه ۳۰۰ دندې د ښځو لپاره شتون لري.
الکساندر ډکرو زیاته کړه: دې پروګرام د ۱۰۰ نویو کاري فرصتونو په رامینځته کولو کې هم مرسته کړې او د کرنیزو محصولاتو د تولید او پروسس کولو ظرفیت یې لوړ کړی دی.
د افغانستان په اقتصادي پرمختګ کې د پروسس کولو صنعتونو رول ته په اشارې سره، هغه زیاته کړه چې د کرنیزو پروسس کولو په سکتور کې پانګونه، د اضافي ارزښت رامینځته کولو سربیره، د بزګرانو د محصولاتو لپاره بازار پیاوړی کوي او د ځایی تولید کونکو عاید زیاتولو کې مرسته کوي.
د ملګرو ملتونو د پراختیایي پروګرام مدیر دا هم وویل چې د دې پلان پلي کول د کرنیزو اکمالاتو زنځیرونه پیاوړي کړي او شاوخوا درې زره بزګران ترې ګټه پورته کړې ده.
د هغه په وینا، دا ملاتړ به د اقتصادي انعطاف زیاتولو، د کورنیو تولیداتو پیاوړتیا او د افغان کورنیو لپاره د دوامداره ژوندانه فرصتونو د رامینځته کولو په هدف دوام وکړي.