د دید خبري اژانس: نړیوال بانک په خپل وروستي راپور کې خبرداری ورکړی چې افغانستان د اقتصادي بحران، کمزورو زیربناوو او جوړښتي محدودیتونو له امله د خوړو خوندیتوب او کارموندنې په برخو کې له جدي ننګونو سره مخ دی. دا وضعیت به تر ۲۰۵۰ پورې د خوړو نړیوالې غوښتنې د زیاتوالي له امله نور هم خراب شي.
نړیوال بانک: افغانستان د خوړو او کارموندنې له بحران سره مخ دی
نړیوال بانک په خپل راپور “د خوړو امنیت پیاوړتیا او د کارموندنې رامنځته کول” کې اعلان وکړ چې افغانستان، د منځني ختیځ، شمالي افریقا، افغانستان او پاکستان سیمې د یوې برخې په توګه، د خوړو خوندیتوب او کارموندنې له جدي ګواښونو سره مخ دی.
د راپور له مخې، د دې سیمې شاوخوا ۱۸ سلنه نفوس د خوړو له ناامنۍ سره مخ دی او ۴۲ سلنه یې نشي کولی چې مغذي خواړه واخلي. نړیوال بانک ټینګار کړی چې په افغانستان کې دا وضعیت د اقتصادي بحران، محدود کورني تولید او په وارداتو تکیه له امله ډیر سخت دی.
راپور وايي چې د کرنیزو زیربناوو نشتوالی، د اوبو ضعیف مدیریت او محدود تولیدي ظرفیت په افغانستان کې د خوړو بحران د زیاتولو اصلي عوامل دي.
په هرصورت، نړیوال بانک باور لري چې افغانستان د وضعیت د ښه کولو لپاره د پام وړ ظرفیت لري. دې ادارې ټینګار وکړ چې په کرنیز سکتور کې پانګونه، په ځانګړې توګه د اغیزمنو اوبو لګولو او کرنیزو نوښتونو پراختیا، کولی شي د خوړو تولید زیات کړي او نوي کاري فرصتونه رامینځته کړي.
نړیوال بانک وړاندوینه کړې چې د سیمه ایزې کچې د کرنې سکتور او د خوړو رسولو سلسلې پراختیا کولی شي تر ۲۰۵۰ پورې شاوخوا پنځه ملیونه نوي دندې رامینځته کړي؛ یو فرصت چې افغانستان هم ترې ګټه پورته کولی شي.
دې ادارې د پالیسۍ اصلاحاتو، د سوداګرۍ چاپیریال ښه کولو، د زیربناوو پراختیا او د سیمه ایزې همکارۍ پراخولو باندې هم ټینګار وکړ، او خبرداری یې ورکړ چې د دې اقداماتو پرته، افغانستان به د خوړو او اقتصادي بحرانونو سره مخ پاتې شي.