د پاکستان پوځ: د کراچۍ په پوځي مرکز بریدګر یو “افغان تبعه” دی
د دید خبري اژانس: د پاکستان پوځ اعلان وکړ چې په کراچۍ کې د رینجرز مرکز باندې د مرګوني برید وروسته، یو له هغو بریدګرو څخه چې ټپي او نیول شوی و، یو “افغان تبعه” دی. د تحریک طالبان پاکستان یوه څانګه جماعت الاحرار ډلې د برید مسؤلیت په غاړه اخیستی دی.
د پاکستان پوځ د یکشنبې په ورځ په یوه بیان کې اعلان وکړ چې د شنبې په ماښام د کراچۍ په ګلستان جوهر سیمه کې د رینجرز مرکز باندې برید کې څلور امنیتي ځواکونه وژل شوي او څلور نور ټپیان شوي دي. د پوځي چارواکو په وینا، بریدګرو هڅه وکړه چې په اصلي دروازه کې له چاودنې وروسته د اډې ودانۍ ته ننوځي، خو د ځای پر ځای شویو ځواکونو له مقاومت سره مخ شول.
د نښتې په جریان کې، شپږ بریدګر ووژل شول او یو بل بریدګر ټپي او ونیول شو. د پاکستان پوځ ټینګار وکړ چې نیول شوی کس یو “افغان تبعه” دی، که څه هم د هغه د هویت په اړه نور جزئیات نه دي خپاره شوي.
د تحریک طالبان پاکستان یوه څانګه، جماعت الاحرار ډلې، د دې برید مسؤلیت په غاړه اخیستی دی.
د پاکستان پوځ خبرداری ورکړی چې د برید د عاملینو پر وړاندې به “د وژل شویو سرتیرو د وینې غچ اخیستلو لپاره” غچ اخیستونکي عملیات ترسره کړي. دا پیښه په دوو کلونو کې په کراچۍ کې د ترټولو لویو ترهګریزو بریدونو څخه یوه بلل شوې او د افغانستان سره په پوله پرتو سیمو کې یې د وسله والو فعالیتونو د بیا راپورته کیدو په اړه اندیښنې زیاتې کړې دي.