د دید خبري اژانس: اروپايي ټولنې اعلان وکړ چې په افغانستان کې د وروستیو ویجاړونکو سیلابونو وروسته به د زیانمنو شویو کورنیو سره د مرستې لپاره ۵۰۰۰۰ یورو اضافي ځانګړي کړي.
د اعلان له مخې، سیلابونو د افغانستان په بیلابیلو برخو کې سیمه ایزې ټولنې سختې اغیزمنې کړې او موجوده بشري وضعیت یې خراب کړی دی. دا نوې مرسته به د سره صلیب او سرې میاشتې د نړیوالو فدراسیون د بیړني غبرګون فنډ له لارې وویشل شي.
د دې نوې مرستې سره، د اروپايي ټولنې د مرستې ټولټال اندازه ۲۲۵۰۰۰ یورو ته لوړه شوې ده. د دې مرستې موخه د سیلابونو څخه اغیزمنو کورنیو ته نغدي مرسته، سرپناه، د څښاک اوبه، روغتیایی خدمات او نور لومړني اړتیاوې برابرول دي.
د اروپايي ټولنې چارواکو ټینګار کړی چې دا مرسته د اغیزمنو شویو خلکو د کړاوونو کمولو او په افغانستان کې د سیلابونو له امله رامینځته شوي بشري بحران ته د ځواب ویلو د پیاوړتیا لپاره ده.